Қазақстанда мамандандырылған халыққа қызмет көрсету орталықтарындағы "көмекшілер" қызметін енді ресми түрде алуға болады. Жеке менеджерлер ақылы негізде кезек күтпей автокөлікті тіркеуге көмектеседі, деп хабарлайды KAZ.NUR.KZ.

Азаматтарға арналған үкімет корпорациясының хабарлауынша, 2025 жылы еліміздің барлық мамандандырылған ХҚКО-да "жеке менеджер" сервисі іске қосылды. Аталған сервис қызмет алушыларды кезектен тыс қабылдауға мүмкіндік береді, бұл күту уақытын едәуір қысқартады.

Жеке менеджер сервисін қолдану үшін мамандандырылған ХҚКО ресепшніне жүгіну керек. Ол азаматтарды кезектен тыс қабылдап, көлік құралдарын тіркеу, есепке қою және есептен шығару, мемлекеттік тіркеу нөмірлік белгісін беру секілді қызметтер бойынша құжаттарды рәсімдейді.

Қызмет түрі таңдалғаннан кейін жеке менеджер қажетті құжаттарды толтырып, келісім-шартты әзірлейді және оларды уәкілетті мемлекеттік органға жалпы тәртіппен жолдайды.

"Азаматтарға арналған үкімет" – азаматтармен өзара ықпалдасу сапасын, жылдамдығын және тиімділігін үздіксіз арттыруға басымдық беретін және қызмет алушыларға бағдарланған ұйым. Азаматтардың жедел қызметке сұранысын ескере отырып, біз 2024 жылы "Жеке менеджер" қызметін алғаш рет Қазақстанның төрт қаласында пилоттық режимде іске қостық, ал 2025 жылдан бастап аталған сервис елдегі барлық мамандандырылған ХҚКО-да енгізілді", – дейді "Азаматтарға арналған үкімет" мемлекеттік корпорацияның басқарма төрағасы Арман Кенжеғалиев.

Айта кетейік, "мамандандырылған ХҚКО жеке менеджері" сервисі алғаш рет пилоттық жоба ретінде Астана, Алматы, Шымкент, Орал қалаларында жүзеге асты. Жарты жыл ішінде жоба өзінің тиімділігін дәлелдеп, ел ішінде қолдану аясы кеңейтілді.

Еске салайық, мамандандырылған ХҚКО-да құжаттар дүйсенбіден жұмаға дейін сағат 9:00-ден 18:00-ге дейін қабылданады. Сенбіде кезекші мамандандырылған ХҚКО 9:00-ден 12:00-ге дейін жұмыс істейді.