Жетісу облысындағы Достық ауылының оқушылары TikTok арқылы білім алады, деп хабарлайды 24kz.

Жергілікті мұғалім әлеуметтік платформада тіл грамматикасын түсіндіреді. Оның бейнеролигін бір миллионнан аса адам көрген. Сабақ беру ісін шығармашылықпен ұштастырған мұғалім, арнайы байқауда жеңімпаз атанды.

Шыңғыс Қалиден, тілші:

- Ботагөз Омарова білім беру үшін 45 минуттық сабақты ғана емес, арасындағы үзілісті де тиімді пайдаланады. Оқушылардың көмегімен ол бір минуттық бейнеролик түсіріп, TikTok-қа жүктейді. Осылайша, әлеуметтік платформа арқылы орыс тілінің емле-ережелерін түсіндіреді.

Ботагөз Омарова, Б.Момышұлы атындағы орта мектеп мұғалімі

- Мен TikTok-ты оқушылардың жүрегіне жол табатын, білім дәнін себетін құрал деп білем. Балалар білмегенін менің парақшамнан көріп үйренсе – мақсатымның орындалғаны. Кейде «видеоны ақша табу үшін жүктейсіз» деген хейтерлердің шабуылына ұшыраймын. Сол кезде періште пейілді балалардың кіршіксіз тілегінен шабыттанып, ақысыз, жан қалауымен жүргізетін ісімді қайта жалғастырам.

Ботагөз Омарова TikTok-тағы жеке парақшасын үш жыл бұрын ашқан. Содан бері мыңнан астам бейнероликті әлеуметтік желіге жүктеді. Пайдалы контент қалыптастырған ұстазға 200 мыңнан аса адам тіркелген. Тізімнің басында өзінің оқушылары тұр.

Айару Батыржанқызы, оқушы:

- Маған Ботагөз Зиядиновнаның роликтері ұнайды. Өйткені олар өте қызықты және өте түсінікті.

Ардақ Жанпейісова, Достық ауылының тұрғыны:

- Көпшілік баланың мінезі әртүрлі. Менің баламның мінезі көпшіліктің ішінде қалып қоя береді. Жеке жұмыс жасап, баланы тарқаннан кейін бала ашылды. Қазір өзі де TikTok түсіреді. Көпшілік ортада өзі жақсы ұстау біледі. Өте көп жетістіктерге жетті өз балам.

TikTok арқылы тұтас елге танылған мұғалімнің ұстаздық еткеніне жиырма жылға жуықтады. Тәжірбиелі әрі білікті маман өз ұжымында да сыйлы.

Кәмшәт Сәулетхан, Б.Момышұлы атындағы орта мектеп директоры:

- Ботагөз Зиядиновнаның жұмыстарын, барлық тәжірбиелерін жас мамандарға көрсетіп жатырмыз. Сол сияқты TikTok, Instagram желісін қосып жатырмыз. Қазір енді жасанды интеллектті қосып, жұмысты толыққанды жасап, басқа ауылды аймақтарға өзіміздің іс-тәжірбиемізді көрсетсек пе деп отырмыз.

Екі жылдан кейін зейнетке шығатын ұстаз әлеуметтік желідегі белсенділігін алдағы уақытта арттыра бермек. «Себебі бейнесабақтарым ұзақ жылдан бойы таралып, бірнеше буынның сауатын арттыруға сеп болады», — дейді ол.

Авторлары: Шыңғыс Қалиден, Қуаныш Түргенбаев