Қазақстанның вице-президенті Ерлан Қарин 2026 жылғы 25 қыркүйекте Каспий теңізіндегі қайғылы оқиғадан кейін қазақстандықтарға үндеу жасады, деп хабарлайды Zakon.kz.
Ерлан Қарин мемлекет басшысы Қасым-Жомарт Тоқаевтың өкімімен елде жалпыұлттық аза тұту күні жарияланғанын еске салды.
"Қаралы күнге байланысты барлық Мемлекеттік Тулар төмен түсірілді. Ойын-сауық шараларына тыйым салынды. Телеарналар мен радиолардың бағдарламасына өзгерістер енгізілді. Ақпараттық сайттар мен мерзімді басылымдар ақ-қара түсті режимге көшірілді." Ерлан Қарин
Ерлан Қаринның сөзінше, белгіленген тәртіпке сәйкес, мемлекеттік деңгейдегі ресми отырыстар мен іс-шаралар қаза тапқандарды үнсіздікпен еске алудан басталуда.
"Қайтыс болған әскери қызметшілердің отбасыларына тағы да қайғысына ортақтасып көңіл айтамын. Жауынгерлер Отан алдындағы әскери борышын адал атқарды. Арнайы Үкіметтік комиссия құрылып, жұмысын бастағаны белгілі. Құқық қорғау органдары тарапынан тиісті тергеу жұмыстары жүргізіліп жатыр. Мемлекет басшысы қаза тапқан азаматтардың туған-туыстарына жан-жақты көмек пен қолдау көрсетуді тапсырды." Ерлан Қарин
Одан бөлек еліміздің белгілі кәсіпкерлері марқұмдардың отбасыларын материалдық тұрғыдан қолдайтындарын мәлімдеуде, – деді Ерлан Қарин.
"Халқымыз осынау қиын сәтте тағы да өзінің береке-бірлігін көрсетіп, ауыр қайғыны бөлісуде. Жұрттың ынтымағы, мемлекеттің беріктігі осындай қысылтаяң шақта білінеді. Сол себепті баршамыз сабыр сақтап, бір-бірімізге қамқорлық танытып, елдігімізді білдіріп, ауыр сынақтан бірлесіп шығайық. Көк байрағымыз әрдайым биікте желбіресін, тұғырынан түспесін." Ерлан Қарин
2026 жылғы 24 қыркүйекте Каспий теңізінің жағалауында өткен оқу-жаттығу кезінде ауа райы қолайсыз болып, жеке құрам "Қайсар" катерінен түсіп жатқан сәтте әскери қызметшілерді теңізге ағызып әкеткен. Олардың үшеуі құтқарылды, 14 әскери қызметші қаза тапты.
Президент Қасым-Жомарт Тоқаев қаза тапқан әскери қызметшілердің туған-туыстары мен жақындарына көңіл айтып, 25 қыркүйекті аза тұту күні деп жариялады.
Ақтау гарнизонындағы оқу-жаттығу кезінде әскери қызметшілердің қаза табуына байланысты ҚР Қылмыстық кодексінің 453-бабының 2-бөлігі ("Ауыр зардаптарға әкеп соққан қызметке салғырт қарау") және 465-бабы ("Кеме жүргізу қағидаларын бұзу") бойынша қылмыстық іс қозғалды.
25 қыркүйекте ІІМ осы оқиғадан кейін Қорғаныс министрлігінің жоғары лауазымды тұлғалары ұсталғанын хабарлады. Олардың қатарында ҚР Қарулы күштері Әскери-теңіз күштері бас қолбасшысының бірінші орынбасары – штаб бастығы, екі әскери бөлімнің командирі, теңіз жаяу әскерлері ротасының командирі және катер командирі бар.
Дереккөз: Zakon.kz · Айгерим Тарина
