0:00:00

Жаңалықтарды Telegram арнамыздан оқыңыз !

Батыс Қазақстан облысы Қаратөбе ауданында Қалдығайты өзені тасып, көпір бұзылды.

Салдарынан өзеннің арғы бетіндегі 9 ауылдың аудан орталығымен көлік қатынасы үзілді. Облыстық маңызы бар «Жымпиты-Қаратөбе» автожолының үстінен тасқын су әлі өтіп жатыр. Аудан әкімі Қайыржан Сүйеуғалиевтің айтуынша, елдімекендерге қауіп жоқ. Арғы беттегі Саралжын, Аққозы, Қаракөл ауылдық округтеріне қарасты 9 елді мекенде 3 мыңға жуық адам тұрады. Жауапты мамандардың айтуынша, азық-түлік, дәрі-дәрмек қоры жеткілікті. Былтыр 90 үйін су басқан Қоржын ауылы да өткелдің арғы жағында орналасқан. Айта кетейік, өткен жылы алапат тасқында Қаратөбе ауданына барған Мемлекет басшысынан ауыл тұрғындары көпір мен жол салып беруді сұраған еді. Өйткені жыл сайын өзендер тасып, ауылдар аралда қалады.

Қадыржан Сүйеуғалиев, Қаратөбе ауданының әкімі:

Былтыр Үкіметтік келісімімен осы Қалдығайты, Жақсыбай өзендеріне жобалық-сметалық құжаттамаға тапсырыс берілген болатын. Қазір жоба жасақталуда. Жоба жасалып біткесін, екі өзенге көпір салу мәселесі қаралатын болады. Қазіргі таңда Қаратөбе ауылына су кіретін қауіп жоқ.

Өңірде көктемгі су тасқыны басталғалы тасжолдардың 9 учаскесін су шайып өтті. Бұған дейін біз эфирде көрсеткен Сырым ауданы Аралтөбе ауылындағы бұзылған көпір әлі қалпына келтірілмеген. Өзен ағысы баяулаған соң, өткелді жөндеу басталады. Бүгін Үкімет басшысының тапсырмасымен Премьер-министр кеңесшісі өңірге барып, тасқынға қарсы іс-шараларды пысықтады.

Ералы Тоғжанов, ҚР Премьер-министрінің кеңесшісі:

Облыс бойынша біраз үлкен жұмыстар жасалынған. Өткен жылғы су тасқынына байланысты тұжырымдар шығарылған. Сол жасалған жұмыстарды қазір тағы да айналып қарап шығамыз. Оның ішінде Сырым ауданы бойынша мәселені қарастырып жатырмыз. Қаратөбе ауданына байланысты ертең барып жағдайды көретін боламыз. Облысты аралап шыққан соң нақты жауаптарын айтамыз.

Ардақ Мұратқызы