Дубайға қазақстандық ет экспорты ұлғайып келеді , деп хабарлайды 24KZ. Бұл істі Әмірліктегі қазақ сауда үйі оңтайландырған. Арнайы рұқсат қағаздарын алуға бұрынғыдай көп уақыт жұмсалмайды. Араб мемлекеті негізінен ұсақ мал етін тұтынады. Ал Орталық Азиядан жеткізілетін өнімге мұнда сұраныс жоғары.

Туристік маусым қызған шақта елдегі ірі шаруа қожалықтары жиі тапсырыс қабылдайды. Қазақстанда 9 бірдей комбинатта жаңа сойылған қой етін салқындатылған қалпында Дубай асыруға мүмкіндік бар. Бұрын тек тірідей жөнелтетін. Осы күні әуе көлігімен аптасына 4 мәрте жеткізіледі. Жылдық көрсеткіш 14 мың тоннаға жуық. Былтыр қазақстандық кәсіпкерлер Әмірлікке 13 тоннадан аса қой етін жөнелтіп, 45 млн доллар пайда тапты.

Айта кету керек, төл басын 50 мыңға дейін жеткізген шаруа қожалықтары ғана Араб Әмірліктеріне тұрақты экспортпен айналысып жүр.

Навар Абдул Вахед, БАӘ «Eurasia» бизнес қауымдастығының бас атқарушы директоры:

- Қазақстаннан Әмірлікке ет өнімдері, минералды су, көкөніс және ұн әкелінеді. Тасымалдың басым бөлігі әуе көлігімен жүзеге асырылса да, көрсеткіш ұлғайып келеді. Біздің бизнес қауымдастық қазақстандық кәсіпкерлерді шығанақпен көбірек алыс-беріс жасауға шақырады. Келешегі мол бағыттың бірі ретінде қой еті экспортын айтуға болады. Бұл шаруада сіздерде тәжірибе де әлеует те жеткілікті.