0:00:00

Жаңалықтарды Telegram арнамыздан оқыңыз !

Түркияда 6 күннен бері өтіп жатқан шеруде 123 полиция қызметкері жараланған. Олардың көбі лақтырылған тас пен отшашулардан жарақат алған. Ел президенті Режеп Тайып Ердоған бұл заңсыздықтардың барлығына оппозициялық партия кінәлі деді. Ал оппозициялық партия өкілдері шеруді Стамбұл мэрі Екрем Имамоғлыны босатпайынша тоқтатпаймыз деп отыр. Ел билігі үлкен қалаларда баспасөз жиындары мен шеру өткізуге тыйымды 1 сәуірге дейін ұзартты. Ал жемқорлық үшін айыпталып түрмеге қамалған оппозициялық партия лидерлерінің бірі, Стамбұл басшысы Екрем Имамоғлына қатысты лаңкестік ұйымға жәрдем берді деген күдікпен тергеу әлі жүріп жатыр.

Режеп Тайып Ердоған, Түркия президенті:

Адамдарды шеруге шығуға шақырған партия лидері мен оның жақтастары полициямыздың жаралануына, дүкендері қиратылған кәсіпкерлер алдында және құны бір миллиард лираға жуық мемлекет мүлкінің қиратылуы үшін жауапты. Мұның барлығы парламентте қарастырылып, арнайы есеп дайындалып, ол материалдар сотқа жіберіледі.

Түркияда қалың қар жауып, қатынас қиындады

Осы Түркияның бірнеше аймағында қалың қар жауып, күн күрт суытты. Бірқатар өңірде боранның кесірінен қалааралық жолдар жабылды. Ал он үш облыстағы мектептерде сабақ тоқтатылған. Кей өңірлерде гүл жарған жеміс ағаштары қар астында қалып, үсіп кеткен. Синоптиктер ауа температурасы жылдағымен салыстырғанда 6-8 градусқа дейін төмен екендігін нақтылады. Наурыз айының басында 25 градусқа дейін көтерілген ауа температурасының күрт төмендеуі ғаламдық жылынудың әсері, дейді мамандар. Дегенмен айдың соңында күн қайта жылынбақ.

Айдос Әшімұлы