Домбыраның құлағында ойнайтын Чили азаматы желі қолданушыларын тәнті етті. Андреа Луенгоға қазақтың ұлттық аспабын үйренуге әнші Димаш Құдайберген себеп болған, деп хабарлайды Qazaqstan ұлттық арнасына сілтеме жасаған KAZ.NUR.KZ.

30 жастағы Андреа – Сантьяго қаласының тұрғыны. Ауруханада мейірбике болып жұмыс істейді. Музыкаға жаны жақын Андреа гитара, укулели, фортепианода ойнайды. Ал домбыраны өз бетінше үйренген. Қос ішекті аспапқа Димаш Құдайбергеннің өнерін көргеннен кейін қызыққанын айтады.

"Алғашында домбыраны бір видеодан көріп, баса мән бермедім. Кейін Димаштың өнерін көріп тәнті болдым. Үш жыл бойы оның шығармашылығын тамашалап, ақыры екі ай күтіп, Чилиге домбыраны тапсырыспен алдырттым", — дейді ол.

Андреа Димаштың концертін көру үшін Қазақстанға арнайы келіп, достарымен бірге елді аралған. Әсіресе, Алматыны өзінің туған қаласы Сантьягоға ұқсатқан. Себебі екі қаланы да таулар қоршап жатыр.

Андреа Чилидегі жергілікті халықтар мен қазақтардың мәдениеті де ұқсас екенін атап өтті.

"Олар да киіз үй сияқты баспаналарды пайдаланады. Қазақ әшкейін тағып көшеге шықсам ешкім таңғалмайды. Себебі зергерлік бұйымдары да ұқсас", — дейді ол.

Қазақ мәдениетіне қызыққан Андреаның арманы – қазақ тілін үйрену, Димашпен кездесу.