Мәнерлеп сырғанаудан АҚШ-тың Бостон қаласында жалауы жел­бі­реген әлем чемпионатында еліміздің спортшысы Михаил Шай­доров тамаша өнер көрсетіп, күміс медальді мойнында жар­қыратты.

700 мыңға жуық тұрғыны бар Бостонда өткен дүбірлі додаға жер-жаһанның барлық мықты мәнерлеп сырғанаушылары жиналды. Жарыс жолына шық­қандар арасында екінің бірі – Олимпиада мен әлем чемпионаттарында атой салған саң­лақтар. Халықаралық, құр­лық­тық жарыстарда жеңіс тұ­ғырына көтерілгендердің қарасы тіптен көп. Олар бес күн бойы әйгілі ТД-гарден аренасына жиналған сан мың көрермен мен көгілдір экранға көз тіккен миллиондаған жанкүйерді ай­шық­ты өнерлерімен қуантты.

Жарыста Илья Малининнің мерейі үстем болды. 20 жастағы АҚШ-тың атақты спортшысы 2023 жылы Сайтамада ұйымдастырылған дүниежүзілік додада қола медаль алса, 2024 жылы Монреальда алдына жан салмады. Сол көрсеткішін биыл да қайталады. Өз отанында өткен байрақты бәсеке барысында 318,56 ұпай жиған Илья бас жүлдені олжалады. Қысқа бағдарламада үздік үштікті түйіндеген Михаил Шайдоров еркін жаттығуда да «шабысынан» жаңылған жоқ. Өз композициясын әдемі орындап шыққан жерлесіміз 287,47 ұпай жинап, күміс медальді еншіледі. Олимпия мен Азия ойындарында бір мәрте, әлем чемпионаттарында үш рет күміспен күптелген жапониялық Юма Кагияма қола жүлдені қоржынға салды. Оның жиған ұпайы – 278,19.

Осы күнге дейін еліміздің мәнерлеп сырғанаушылары әлем чемпионаттарында үш рет жеңіс тұғырына көтерілген еді. Алғашқы екі жүлдені Денис Тен иеленді. 2013 жылы Лондонда күміс алса, 2015 жылы Шанхайда қолаға қол созды. 2019 жылы Сайтамада Элизабет Тұрсынбаева асқан шеберлігімен тәнті етті. Қытай елінде қазақ қызы күміспен күптелді. Міне, енді 20 жастағы Михаил Шайдоров еліміз спортының мерейін өсіріп, абыройын асқақтатты.

Жарыс аяқталған бетте БАҚ өкілдеріне сұхбат берген су жаңа әлемнің вице-чемпионы: «Мұз айдынына шыққанда медаль туралы еш ойлаған жоқпын. Тек қана дүйім жұрттың алдында өзімнің шынайы мүмкіндігімді көрсетіп, сырғанаудан ләззат алғым келді. Осы еркіндік, өз-өзіме деген сенімділік мені жеңіс тұғырына жетеледі», деп ақтарыла сөйледі.

Әйелдер арасында бақ сынаған Софья Самоделкина (117,78 ұпай) жарыс­ты 14-орынмен қорытындылады. Ол жеңіс тұ­ғы­рына маңайлай алмаса да, осы нәти­же­сі­нің арқасында Олимпия ойындарына қа­ты­су­шылардың тізіміне қосылды. 18 жастағы спортшыға осының өзі аз табыс емес.

Үздік шыққан сырғанаушылар жа­йында айтар болсақ, АҚШ аруы Алиса Лю (222,97) алдына жан салмады. Ол осыдан үш жыл бұрын Монпельедегі әлем чем­пио­натында қола медальді иелен­геннен кейін үлкен спортпен қош айтысқан еді. Содан мұз айдынына қайта оралып, күні кеше ғана төрткүл дүниенің теңдессізі деп танылды. Күміс, қола медальдарды Жапонияның қос жұлдызы – Бейжің Олимпидасының қола, командалық сайыстағы күміс жүлдегері, әлемнің үш дүркін чемпионы, Азия ойындарының жеңімпазы, жапониялық Каори Сакамото (217,98) мен «Төрт құрлық турнирінде» топ жарған Монэ Тиба (215,24) еншіледі.

Жұптық сайыста Рику Мию­ра/Рюити Кихара (Жа­пония) жеңімпаз атанса, Мине­рева Фабьен Хазе/Никита Володин (Германия) мен Сара Конти/Ник­коло Маччи (Италия) жүл­дегерлер қатарына қосылды. Спорттық бишілердің бәсекесінде Мэдисон Чок/Эванс Бейтс (АҚШ) тең­дессіз деп танылды. Пайпер Гиллес/Поль Пуарье (Канада) кү­міспен күптелсе, Лайла Фир/Льюис Гипсон (Ұлыбритания) қолаға қол жеткізді.