Орталық даму кемшілігі және басқа да неврологиялық сырқаттары бар балаларға дәстүрлі қытай медицинасы арқылы ем-дом жасайды, деп хабарлайды 24kz.

Сондай-ақ инсульт пен жүйке жарақатын алған науқастарды, омыртқа, буын ауруларына шалдыққан жандарды емдейді. Ұйқысыздыққа, аллергиялық дертке душар болғандарға көмек көрсетеді. Жалпы Астанадағы Сиань клиникасы екі жыл бұрын жұмысын бастаған еді. Бүгін кеңейіп, жаңа ғимаратқа көшіп отыр. Орталықты Сиань қаласындағы дәстүрлі медицина ауруханасы мен Қазақстандағы «Сиань клиникасы» бірлесе тұрғызды. Мұнда қытайлық мамандардан бөлек, сол жақта оқып келген отандық дәрігерлер де емдеу шараларын жүргізеді. Ашылу салтанатында Денсаулық сақтау вице-министрі Тимур Мұратов Қытайдың Шэньси провинциясымен әріптестік жаңа кезеңге өткенін атап өтті. Бүгінде тараптар арасында ауыл шаруашылығы, энергетика, логистика және басқа да салалар бойынша ауқымды ынтымақтастық орнаған.