Батыс Қазақстан облысының әкімі Нариман Төреғалиев бір отбасының бес бірдей баласы көз жұмған қайғылы жайтқа қатысты пікір білдірді, деп хабарлайды KAZ.NUR.KZ.

Төреғалиев Facebook желісінде Сырым ауданында көз жұмған балалардың ата-анасы мен туыстарына көңіл айтты. Ол оқиға орнына орынбасары мен аудан әкімі жеткенін мәлім етті.

"Әкімдік тарабынан барлық қажетті көмек көрсетіледі: жерлеу рәсімін ұйымдастыру, психологиялық көмек көрсету, баспанамен қамтамасыз ету және өзге де әлеуметтік қолдау шаралары",- деп уәде берді Төреғалиев.

Өңір басшысы қазіргі уақытта оқиға орнында ТЖД мамандары, полиция департаментінің қызметкерлері, медицина қызметкерлері және басқа да тиісті қызмет өкілдері жұмыс істеп жатқанын, жағдайды бақылауында ұстап отырғанын жеткізді.

Бұған дейін Батыс Қазақстан облысындағы ауылда бес бала көмірқышқыл газынан уланып, көз жұмғанын жазған болатын. Алдын ала мәлімет бойынша, қайғылы оқиға 4 маусымда күндіз Сырым ауданындағы Жымпиты ауылында болған.

Алдын ала болжам бойынша, бес бала көмірқышқыл газынан уланып көз жұмған.

"Балалардың барлығы тыныстамай жатқан күйі жедел жәрдеммен аудандық ауруханаға жеткізілді. Дәрігерлер бар күш-жігерін салғанымен, балаларды аман алып қалу мүмкін болмады", — деп хабарлады Батыс Қазақстан облысының денсаулық сақтау басқармасынан.

Кейін Сырым ауданының әкімдігі сағат 15:00 шамасында Жымпиты ауылында тұрғын үй өртеніп жатқаны туралы хабарлама түскенін мәлімдеді. Жану өнімдерінен улану белгілері бар бір жастан алты жасқа дейінгі бес бала өрт орнынан ес-түссіз күйде аудандық ауруханаға жеткізілген. Бір отбасының бес баласы да ес жимастан ауруханада көз жұмды.

Отбасының 35 жастағы әкесі МКҚК "Демалыс орталығында" қараушы болып, ал анасы жергілікті дүкенде жұмыс істейді. Бес балалы отбасы жалдамалы пәтерде тұрған. Өрт кезінде ата-анасы жұмыста болған.