«Ертіс орманы» мемлекеттік табиғи резерваты «Парктер шеруі » экологиялық акциясын қорытындылады, деп хабарлайды 24kz.

Дәстүрлі табиғатты қорғау шарасына биыл 11 мыңнан астам павлодарлық қатысты. Оқушылар мен студенттер орман алқаптары мен су айдындарын тазалады. Құстарға ұя жасап, жасыл желекті көбейтуге үлес қосты. Павлодарда өткен мерекелік жиында орман флорасы мен фаунасы туралы жан-жақты мағлұмат айтылып, балалар ағаш конструкторлар арқылы жануарлардың сұлбасын құрастыруды үйренді. Табиғатқа деген сүйіспеншілікті арттырып, қоршаған ортаға жауапкершілікпен қарауға үндейтін мұндай бастамалар алдағы уақытта да жалғасын табады.

Виктория Ладыгина, оқушы:

- Мен бүгін ағаштан конструктор жасап үйрендім. Маған өте ұнады. Мерекеде түрлі байқаулар ұйымдастырылған, көңілді өтті.

Арайлым Атығаева, «Ертіс орманы» табиғи резерватының маманы:

- Жалпы резерват «Таза Қазақстан» экологиялық акциясы аясында бірқатар маңызды шаралар өткізген болатын. Соларды атап өтетін болсақ, 8300 дана кәдімгі қарағай тұқымын, 12 мың қарағай көшеттерін екті. Бұл тек қана бір күндік бастама емес, әлі де өз жалғасын табады деген сенімдеміз. Басты мақсат – ол экологиялық тазалықты сақтап, қоршаған ортаны қорғап, экологиялық мәдениетті қалыптастыру және де табиғатымызды таза қалпында болашақ ұрпаққа аманат ету.