Бүгін бас қалада мал шаруашылығы саласының үздік қызметкерлері марапатталды, деп хабарлайды 24kz.

Атап айтқанда, 17 маман Премьер-министрдің Құрмет грамотасына ие болып, 12 қызметкерге «Еңбек ардагері» мемлекеттік наградасы, ал 16 еңбеккерге «Ауыл шаруашылығы саласының үздігі» төсбелгісі табысталды. Аталмыш салада аянбай еңбек етіп жүргендер де, министрліктің алғыс хатымен марапатталды. Олардың қатарында азық-түлік қауіпсіздігі мен ауылдық елді-мекендердің дамуына айтарлықтай үлесін қосып жүрген ірі шаруа қожалығы иелерімен қатар сауыншы, жылқышы, қойшы сынды қарапайым еңбек адамдары да бар. Осылайша, кәсіби мереке қарсаңында, жалпы алғанда 200-ден астам сала озаты, мемлекеттік және ведомстволық марапатты иеленді.

Айдарбек Сапаров, ҚР Ауыл шаруашылығы министрі:

- Биыл «Жұмысшы жылы» деп аталды, президенттің айтуымен. Сондықтан біз қазір осы жерге 200-ден адам жинап отырмыз. Соның ішінде 59-ы марапатталады. Қалғаны облыста марапатталады. Мықты сауыншылар, малшылар, қойшылар, жылқышылар деген сияқты. Оның ішінде селекционерлер бар, бригадирлер бар мал шаруашылығының. Сол адамдар марапатталады. Өйткені сол кісілердің еңбегі. Күні-түні жұмыс.

Еласхан Елеусізов, Ауыл шаруашылығы саласының зейнеткері:

- Еңбек жолымды 1975 жылы бастадым. Қазір зейнеткермін. Зейнеткер болсам да, жұмыс жасап отырмын. Ауыл шаруашылық қожалықтарға білген тәжірибемді жеткізіп отырмын, ақыл-кеңесімді беріп отырмын.