Лондонда Қазақстандағы халықаралық дауларды шешудің озық тәжірибелері талқыланды.

“Астана” халықаралық қаржы орталығының Соты мен Төрелік орталығының өкілдері 7 жыл ішінде жеткен жетістіктерімен бөлісіп, өңірлік арбитраждың өзекті мәселелерін ортаға салды.

“Астана” халықаралық қаржы орталығының Соты мен Халықаралық төрелік орталығы құрылғалы бері 3800-ден астам іс қаралып, тараптардың талап-тілектері 100 пайыз қанағаттандырылған. Клиенттері елімізге Еуразия мемлекеттерінен, сондай-ақ Қытай, Біріккен Араб Әмірліктері және Үндістаннан келіп, бизнес жүргізіп жатқан инвесторлар.

Кристофер Кэмпбелл-Холт, АХҚО соты мен ХТО тіркеушісі және аппарат басшысы:

- Меніңше, біз шынымен де бәсекелестікке төтеп бере аламыз және жоғары халықаралық стандарттарға саймыз. Басқалармен жарысқымыз келмейді. Бірақ біз әлем бойынша әділдік, заң үстемдігі және сот төрелігін ілгерілетуге үлес қосқымыз келеді. Еуразиялық нарықта мұндай қызмет ұсынатындар жоқ деп ойлаймын. Инвесторлар осыны біліп, Қазақстанға инвестиция құюда.

Зия Акынджы, Ыстамбұл төрелік орталығының төрағасы:

- Барша жұрт Қазақстанның осы саладағы жетістіктері туралы айтып жатыр. Қаржы орталығының Соты мен төрелік орталығының жұмысы ғажап. Біз сырттан сүйсініп бақылап жүрміз. Менің ойымша, еліңіз еңбегінің жемісін көріп, даңғыл даму жолымен ілгерілеп келеді.

Лондон халықаралық даулар апталығына ғасырлық тарихы бар компания өкілдерінен бастап, тұсауы жақында ғана кесілген мекемелердің жетекші сарапшыларына дейін қатысты. Шараның биылғы тақырыбы – “Дауларды шешудегі инновациялар”. Әлемдегі геосаяси, экономикалық және технологиялық өзгерістер жағдайында құқықтық қауымдастықтың жаһандық тәуекелдерге бейімделуі әңгіме арқауына айналды.

Хавар Куреши, халықаралық даулар апталығының ұйымдастырушысы:

- Апталыққа қатысушылардың саны биыл рекордтық деңгейге жетіп,10 мың адамнан асты. Шара заң институттары үшін ғана пайдалы емес, сондай-ақ олардың қызметіне жүгінетін компанияларға да өте керек. Соңғылары саладағы трендтер мен жетістіктер туралы біле алады.

Апталық барысында батыс елдері қолданатын санкциялар режимі мен халықаралық құқық арасындағы қайшылықтар тақырыбы да кеңінен қозғалды. Бұл мәселе әсіресе бейтарап үшінші елдердің және халықаралық корпорациялардың мүдделерімен тікелей байланысты болып тұр. Қатысушылар қатаң шектеулер жағдайында дауларды шешу жолдарын ой елегінен өткізді.

Ғалымжан Қараманұлы