Футболдан Қазақстан құрамасы кешегі жеңілісінен кейін әлем чемпионатына шығу мүмкіндігінен алыстай түсті, деп хабарлайды 24kz.

Қазір отандастарымыз өз тобында 4-орында келе жатыр. Көш басында Солтүсік Македония. Сондай-ақ, Ұлттық құрама капитаны Асхат Тағыберген матчтан кейін спорттық мансабын аяқтады.

Мерей Қанапия, тілші:

- Қазақстан Әлем чемпионатына іріктеу аясында өз алаңында Солтүстік Македониямен ойнап, ұтылып қалды. Қорытынды есеп – 1:0. Қарсыластар сапынан Александр Трайковски матчтың 33-минутында есеп ашып, жеңіс голын соқты.

Әли Әлиев, футболдан ұлттық құраманың бас бапкері:

- Солтүстік македониялықтарда ойын барысында тек бір мүмкіндік болды. Соны өте сәтті пайдаланып кетті. Ал біздің қандай қарқынмен ойнағанымызды көрдіңіздер. Тепкен доптарымыз қақпа бағанасы мен маңдайшасына тиіп, кері серпіліп жатты. Одан бөлек, Бақтияр Зайнутдиновтің болмауы да өз әсерін тигізді.

Сондай-ақ матч аяқталған бойдан ұлттық құрама капитаны Асхат Тағыберген спорттық мансабын аяқтады. Оның бұл шешімін бас бапкер мен командаластары ойыннан кейін білген. 34 жастағы жартылай қорғаушы Қазақстан атынан 63 матчқа қатысып, 3 гол мен 7 нәтижелі пастың авторы атанды.

Асхат Тағыберген, Ұлттық құраманың экс-капитаны:

- Барлық хейтерлер айтып жатыр ғой, жастарға жол бермейді деп... Енді жастарға жол бердік. Мансабымды жас жігіттер жалғастырады деген ойдамыз. Алда ұлттық құрамаға жеңіс, табыс, еуро мен әлем чемпионатына шығуға шын жүректен тілектеспін. Қолымнан келгенше барлық күшімді бердім деп ойлаймын. Әрине, қиын. Ұлттық құраманың бір бөлшегі болғаныма, капитан болғаныма қуаныштымын.

Әли Әлиев, футболдан ұлттық құраманың бас бапкері:

- Асхат өз мансабын аяқтайтынын киім ауыстыратын бөлмеде айтты. Әрине, оның соңғы ойынында жеңіске жете алмадық. Өкінішті. Ол ұлттық құрама сапында жастарға үлгі болатындай өнер көрсетті.

Қазақстан әлем чемпионатына іріктеу аясында 3 матч өткізіп, 3 ұпаймен өз тобында төртінші орында келе жатыр. Қоржында 1 жеңіс пен 2 жеңіліс бар.

Ал Солтүстік Македония 8 ұпаймен көш басына шықса, Уэльс 2-ші, Бельгия 3-орынға шықты. 5-орында Лихтенштейн құрамасы. Енді отандастарымыз 4 қыркүйекте өз алаңында Уэльспен ойнайды.

Авторы: Мерей Қанапия