Биыл елімізде шамамен 18 мың Төтенше жағдайлар министрлігі қызметкері тұрғын үй төлемдерімен қамтамасыз етіледі. Бұл туралы Сенат кулуарында Төтенше жағдайлар вице-министрі Кеген Тұрсынбаев мәлімдеді, деп хабарлайды Egemen.kz.

Оның айтуынша, тұрғын үй төлемдерінің мөлшері тұрғын үй бағасының өзгеруіне, инфляция деңгейіне, қызмет өткеретін аймағына және отбасы жағдайына байланысты болады.

«Мысалы, Астанада төлем мөлшері шамамен 92 мың теңге. Бұл сома жыл сайын өзгеріп отырады. Үкімет жалдамалы тұрғын үй бағасын реттеп отырады. Өскеменде – 49 мың теңге, Семейде – 48 мың теңге. Әр қалада бір адамға арналған Үкімет бекіткен төлем мөлшері бар», деді Кеген Тұрсынбаев.

Вице-министрдің айтуынша, төрт адамнан тұратын отбасы үшін Үкімет қаулысы негізінде 50 мың теңгеден, яғни жалпы 200 мың теңге көлемінде төлем қарастырылады.

«Заң 30 маусымда күшіне енген соң, тиісті тұрғын үй төлемдері жүзеге аса бастайды. Сол уақытқа дейін біз өзіміздің заңға тәуелді актілерімізді дайындап үлгеруіміз қажет. Арнайы бөлім құрылып, кімге төлем тиесілі, кімге тиесілі емес екенін анықталады», деді ол.