Алматы облысының Ұйғыр ауданында «APRICOT FEST» өрік фестивалі өтті.

Аталған іс-шара Қарадала өңірінің брендіне айналған жеміс түрін кеңінен насихаттап, өнімділікті еселеп арттыруға және ауданға туристерді көптеп тартуға арналған. Жергілікті атқарушы билік өкілдері көтерген бастаманы шаруалармен қоса, Қарадала халқы да қызу қолдап отыр.

Ұйғыр ауданының аумағында 4000 гектардан астам жеміс бағы бар. Соның 3500 гектарында сары өрік, қалған бөлігінде алма өседі. Шонжыда биыл алғаш рет ұйымдастырылған өрік фестиваліне халық көп жиналды.

Қуат Байқожаев, облыстық мәслихат төрағасы:

- Бұл ең алғаш, тұңғыш рет ұйымдастырылып отырған іс-шара. Өйткені біздің Қазақстандағы осы абрикостың өсетін үлкен аумақты жеріміз осы жерде. Қырғыз Республикасының кәсіпкерлері, Өзбекстан Республикасының кәсіпкерлері келіп, біздің өнімдерді сатып алып жатқанының куәгері болып отырмыз.

Қуанышбек Мирамбекұлы, облыстық туризм басқармасының бастығы:

- Келесі жылдан бастап біздің жоспарымызда осы абрикостың өсуі фестивалін ұйымдастыру «цветение абрикоса» деп аталады. Ол деген сәуір айында ұйымдастырамыз құдай қаласа келесі жылдан бастап. Соның бәрі осы туристердің қызығушылығын көбейтуде.

Ұйғыр ауданының шаруалары жыл сайын 20-22 мың тонна сары өрік жинайды. Оның 4 мың тоннасы көршілес Ресей мен Қырғызстан, Өзбекстанға экспортталса, қалғаны ішкі нарыққа шығады.

Бота Елеусізова, Ұйғыр ауданының әкімі:

- Бүгін ғана тағы бір үлкен іс-шараның куәсі болдық. Ол жерде абрикосты кептіретін цехтың ашылу салтанаты өтті. Келешекте де бұл экспортқа шығатын және өзіміздің ішкі нарықты қамтитын өнім болмақ.

Шонжыдағы өрік фестивалі барысында ауыл шаруашылығы өнімдерінің көрмесі ұйымдастырылып, қазақ күресі, гір көтеру, армрестлинг, асық атудан жарыс өтті. Аталған іс-шара соңы қазақ эстрада жұлдыздарының концертіне ұласты.

Ардақ Айбарұлы, Аят Дүйсенбаев