Иран БАҚ-тары Израиль жасаған соққы салдарынан Иранда жоғары шенді бірнеше әскери тұлға қаза тапқанын жазып жатыр, деп хабарлайды KAZ.NUR.KZ.

Иранның Isna ақпарат агенттігінің жазуынша, Израиль жасаған соққы салдарынан Иран Қарулы Күштері Бас штабының басшысы, Иран ислам революциясы сақшылар корпусының генерал-майоры Мохаммад Багери қаза тапқан.

Tasnim басылымының жазуынша, Иран ислам революциясы сақшылар корпусының қолбасшысы Хоссейн Салами де қаза болған.

IRNA агенттігінің мәліметінше, ядролық қару дайындаушы-физиктер де мерт болған. Олар: Иранның атом энергиясы ұйымының бұрынғы басшысы Ферейдун Аббаси пен Ислам университетінің президенті Азад Мохаммад Мехди Техранчи.

Сондай-ақ Mehr басылымының жазуынша, Иран Қарулы Күштерінің "Хатам аль-Анбия" орталық штабының қолбасшысы генерал Голамали Рашид те қаза тапқан.

РИА Новости агенттігінің жазуынша, Израильдің Иранға жасаған соққысы салдарынан кем дегенде бес адам қаза болып, 20 адам зардап шеккен.

"Мерт болған бес адам мен зардап шеккен 20 адам Нармактағы (Тегеранның солтүстік-шығысындағы аудан) бүлінген нысаннан шығарылды", — деп жазады ирандық дереккөзге сілтеме жасаған басылым.

Естеріңізге сала кетейік, бүгін түнде Израиль әскері Иранға соққы жасады. БАҚ Тегеранда жарылыстар болғанын жазды. Әлеуметтік желілерде қираған нысандардың фото, видеосы тарады.

Ал Израильде төтенше жағдай жарияланды. Елдің қорғаныс министрі Кац жақын арада жауап ретінде Израиль мен оның бейбіт тұрғындарына соққы жасалуы мүмкін екенін ескертті.

Таяу Шығыстағы жағдайдың ұшығуына байланысты Қазақстанның Израильдегі елшілігі мәлімдеме жасады. Израильдегі Қазақстан азаматтары үшін жедел желі іске қосылды.