Таяу Шығыста ахуал ушыға түсті. Иран жұманың кешінде Израильге қарымта шабуыл жасады. Ал Израиль Иранға қарсы шабуылдарын бүгін тағы жалғастырды. Екі елде де бейбіт тұрғындар зардап шеккен. Тегеран болса, Израильді қорғайтын кез келген елдің аймақтағы базаларына соққы беретінін ескертті.

Иран мен Израиль түні бойы бірін-бірі зымырандармен атқылады. Тель-Авивтің кешегі шабуылына қарымта ретінде Тегеран жүздеген баллистикалық ракета жіберген. Израильде 3 адам қаза тауып, 19-ы жараланды.

Ал Иранда Израильдің әуе шабуылынан 78 адам қаза тауып, 320-дан астам адам жараланды. BBC-дің дерегінше, бүгінгі шабуылдан тағы екі жоғары лауазымды генерал мерт болған. Иранның БҰҰ-дағы елшісінің айтуынша, қайтыс болғандардың көбі – бейбіт тұрғындар. Дипломат АҚШ-ты Израильге қолдау көрсетті деп айыптады.

Әмір Сейіт Иравани, Иранның БҰҰ-дағы өкілі:

Өткен түні Израиль Американың толық ақпараттық және саяси қолдауымен Иранға шабуыл жасап, азаматтық нысандарына соққы берді. БҰҰ-ның Қауіпсіздік Кеңесі шұғыл әрекет етіп, басқыншылық актілерді тоқтатуы тиіс. Үнсіз қалу – қылмысқа қатысумен тең.

Израиль болса, ешкімнің қолдамағанын айтты. Ал Иранды бейбіт тұрғындарға шабуыл жасады деп айыптады. Израиль өкілдері Тегеран қарымта шабуыл жасап, шектен шықты және бұл үшін жауап береді деп мәлімдеді.

Биньямин Нетаньяху, Израиль премьер-министрі:

Израиль операциясының мақсаты – Ислам режимінің ядролық қаупінің алдын алу. Соңғы 24 сағатта Иранның жоғары шенді әскери басшыларын, аға физик ғалымдарын, уран байытуға арналған ең ірі нысанын, баллистикалық зымыран арсеналының бір бөлігін жойдық. Мұнымен шектелмейміз.

The New York Times газетінің жазуынша, Израильдің барлау қызметі шабуылды мұқият жоспарлаған. «Моссад» дәлдеп тиетін қару жүйелерін Иран аумағындағы зымыранға қарсы қорғаныс жүйесіне жақын маңға орнатқан. Ал шабуылдан ұзақ уақыт бұрын Израиль барлауы Иран жерінде соққы беруші ұшқышсыз аппараттар базасын құрса керек.

БҰҰ Иран мен Израильге шабуылды тоқтатуға үндеді. Бас хатшы Антониу Гуттериш бейбітшілік пен дипломатия үстем болуы тиіс дейді. Ал Еурокомиссия президенті Урсула фон дер Ляйен X әлеуметтік желісінде аймақтағы тұрақтылықты сақтау өте маңызды деп мәлімдеді.

Арай Төлегенқызы