Ел басына күн туған сұрапыл соғыс жылдарында әйелдер де ерлермен бірге ерен ерліктің үлгісін көрсетті. Сын сағатта Орал өңірінен жүзге жуық ару қолына қару алып, майданға аттанды. Солардың бірі – биыл Жеңістің 80-ші көктемін қарсы алып отырған Анастасия Чегнахаева.

Ол Қиыр Шығыста байланысшы болып қызмет етіп, Жапон соғысына қатысқан.

Ерденбек Жылқайдарұлы, тілші:

- Соғыстың аяқталғанына 80 жыл өтсе де, қарт майдангер Морзе әліппесін әлі күнге дейін жатқа біледі. Бұлай болуы да заңды. Өйткені ол 21 жасында өз еркімен майданға аттанған қайсар ару еді. Қиыр Шығыста байланысшы қызметін атқарып, кеме палубасында таудай толқындарға төтеп бере жүріп, құпия бұйрықтарды қабылдады. Оның айтуынша, 1945 жылы Жапонияға соғыс жариялау туралы жарлықты 34-бомбалаушы авиациялық дивизияға өзі жеткізген екен.

Анастасия Чегнахаева, соғыс ардагері:

- Мен соғысқа Орынбор облысынан аттандым. Кілең қыздар болдық. Аналары вокзалда қимай шығарып салды. Менің қасымда жылайтын да жан болған жоқ. Өйткені мен анасыз өстім. Содан Қиыр Шығысқа бардық. Талай рет кеме суға батып, қаруластарым қаза тапты.

Бас штабқа жау әскері мен ұрыс барысы туралы құнды мәліметтерді уақытылы жеткізіп тұрғаны үшін Анастасия Чегнахаева 2 дәрежелі Отан соғысы орденімен, Жапонияны жеңгені үшін медальдерімен марапатталады. Соғыстан соң Орал педагогика институтын тәмамдайды. Білім беру және әлеуметтік қамсыздандыру саласында еңбек етеді.

Анастасия Чегнахаева, соғыс ардагері:

- Соғыс ол тәтті бал емес. Неше түрлі қиын күндерді бастан өткердік. Бірақ мойыған жоқпыз, еңсемізді тік ұстадық. Міне, қазір бір ғасырдан астық. Өзімді әлі жақсы сезінем. Көңіл-күйім жақсы. Соғыс ешқашан қайталанбасын! Бейбіт күнге жетер ештеңе жоқ.

8 наурыз мерекесімен құттықтаушылар ардагерге таң қалатындарын жасырмайды. Ғасырдан асса да, әжей әлі тың. Теледидар қарап, газет-журнал оқып, ара-арасында әндетіп, кейде тіпті билеп те жібереді екен.

Роман Жумиев, Деркөл кенттік округі әкімінің орынбасары:

- Мейрам сайын құттықтауға тырысамыз. Бүгін қала әкімінің құттықтауымен, депутаттармен келіп тұрмыз. Бұл ардагер мамырда 104 жасқа толады. Сосын білесіздер, Отан соғысы аяқталғанына 80 жыл. Соған жоспарларымыз бар.

Отан үшін от кешкен кейуананың қазіргі тілегі – елдің тыныштығы.

Авторлары: Е.Жылқайдарұлы, Қ.Ақрап, Э.Аюпов