Болашақ заңгерлер Астана қаласы прокуратурасының жұмысымен танысты. «Заң мен тәртіп» тұжырымдамасы аясында қолға алынған шарада 80-нен астам студент қоғамдық тәртіптің қыр-сырына үңіліп, прокуратура мамандарынан тұшымды ақпарат алды.

Қаладағы бейнекамералардың жұмысы, заңбұзушылық фактілерінің тіркелуі назарға алынып, алаяқтық әрекеттердің алдын-алу амалдары түсіндірілді. Ашық есік форматындағы мұндай шара алғаш рет ұйымдастырылып отыр. Бұл үрдіс алдағы жылдары да жалғасын таппақ.

Арайлым Оразова, Астана қаласы прокуратурасының өкілі:

- Прокуратура – бұл заңды қадағалайтын орган ғана емес, ол азаматтардың құқығы мен бостандығын қорғайтын, әділдік пен заңдылықты қамтамасыз ететін мемлекеттік орган. Ашық есік күнін өткізу арқылы біз жастардың құқықтық сауаттылығын арттырып, олардың кәсіби бағдарын айқындауға ықпал етуді көздейміз. Сонымен қатар бұл болашақ мамандарға прокуратура қызметінің ішкі мәдениеті мен жауапкершілігін көрсетуге тамаша мүмкіндік.

Бекет Серікбай, Мақсұт Нәрікбаев университетінің 3 курс студенті:

- Жалпы бізге ұнады. Көптеген профилактикалық ақпарат берді. Прокуратура қызметкерлеріне бізді шақырғанына рақмет.Менің негізгі арманым – Бас прокурор болу.