Қызылорда облысында «Жамбы ату» спортына бұрымдылар да бет бұра бастады .

Жаңақорғандық Алтынай Исрайыл сәйгүлік мініп, садақ тарту шеберіне айналған. 17 жастағы Алтынай Исрайыл бала күнінен атқа мінуге қызыққан. Жылқының жалына жабысқан ағаларына еріп, ол да тұлпар тізгіндей бастаған. Ат құлағында ойнаған арудың ерекше талантын ауылдағы ұлттық спорт бапкерлері байқап, жамбы атуға баулыған. «Сәйгүлік үстінде садақ тартуды үйрену оңай болған жоқ», — дейді мерген қыз.

Алтынай Исрайыл, оқушы:

- Қорықпа қорықсаң қорқа бересің, сосын осы орнында қаласын. Сондықтан жылдам бол, тірі бол деді. Дайындалып жүрмін, дым қиындығы жоқ. Басында сәл-пәл қорқыныш болғаны рас.

Екі жыл бойы жамбы атуды серік еткен бірқатар турнирде олжа салып үлгерді. Бірақ жеңіс тұғырының ең биік сатысына шығу әзірге бұйырмапты. Мерген қыз биыл осы арманына жету үшін тыңғылықты дайындыққа кірісіп отыр.

Исламхан Боранбаев, облыстық ат спорты түрлерінен аға жаттықтырушы:

- Алда Қазақстан бойынша чемпинат күтіп тұр. Сол чемпионатта Құдай қаласа жүлде күтеміз. Бұған дейін республикалық турнирлерге, кубок федерациясына қатысты. Бірақ бірінші рет ресми чемпионатқа қатысайын деп тұр.

Алтынай облыс бойынша жамбы атумен қатар, дәстүрлі садақ ату спортын қатар меңгерген алғашқы бұрымды. Табиғаты нәзік болғанымен, рухы қайсар қыз жігіттермен бірге жарысып, жаттығады.

Ат үстінде садақ атудың төрт түрі бар. Мажар, түрік, азиялық және қазақ стилі. Соның ішіндегі ең қиыны осы қазақ стилі екен. Мұндағы бір ерекшелік диаметрі небәрі 15 сантиметр болатын жамбыны 10 метр қашықтықтан дәл көздеу керек. Дәл осы қазақ стилі – жамбы атудан Алтынай әлем чемпионы болуды армандайды. «Осы жолда тер төге берем», — дейді ұстанымына берік садақшы қыз.