Ішкі істер саласында нәзік болмысын жоғалтпаған қыз-келіншек көп.

Ерлермен иық теңестіре еңбек етсе де, отбасының берекесі, жан-жарының еркесі бола білген Марал Түсіпжанова солардың бірі. Көпбалалы ана жеке құрамның тәрбиесіне де жауапты.

Марал Түсіпжанованың әр жұмыс күні осылай аяқталады. Әйел үшін бұдан асқан бақыт бар ма? Ол 15 жыл бойы құқық қорғау саласында тер төгіп жүр. Соған қарамастан, нәзік қалпынан айнымаған. Бұған жолдасының қолдауы мен балаларының махаббаты да сеп болса керек.

Сағадат Болысбек, оқушы:

- Мен анамдай форма кигім келеді. Маған осындай форма ұнайды. Мен болашақта анам мен әкем сияқты әскери қызмет атқарғым келеді.

Құқық қорғау саласы асқан жауапкершілікті талап ететінін Сағадат әлі ұғына қойған жоқ. Дегенмен ол үшін ата-анасы үлгі, солармен мақтанады. Оның ата-анасы да бала арманына жеткен жандар. Марал Түсіпжанова қазір ІІМ Көліктегі полиция департаментінде қызмет атқарады. Міндеті — жеке құрамды жасақтау.

Марал Түсіпжанова, ҚР ІІМ Көліктегі полиция департаменті басқармасының ерекше тапсырмалар жөніндегі аға инспекторы:

- Мен 2012 жылы тұрмыс құрдым. Таңдаған жолдасым да осы құқық қорғау саласында қызмет атқарады. Қазіргі күні үш қыз, бір ұл тәрбиелеп отырмыз. Сондықтан маған қиындық тудырмайды. Жолдасым мені түсінеді. Әрқашан қолдайды.

Әрине ерлермен тең жұмыс істеу қыз-келіншектерге оңай емес. Кейде қаталдық та керек. Кез келген тосын жағдайға дайын болу маңызды. Осы қасиет Марал Түсіпжанованың да бойынан табылады. Сонысымен көпке үлгі.

Қайрат Ақмырзаев, ҚР ІІМ Көліктегі полиция департаментінің Тәрбие және кадр жұмысы басқармасы бастығының орынбасары:

- Марал Бақтиярқызын 2010 жылдан бері танимын. Біздің көліктегі полиция департаментіне сіңірген еңбегі өте көп. Тәрбие және кадр жұмысы басқармасында атқарып жатқан лауазымы ерекше тапсырмалар жөніндегі аға инспектор – өте жауапты лауазым болып есептеледі. Осы қызметкерлердің жұмысын жақсарту бойынша өзінің үлесін қосқаны мықты.

Көліктегі полиция департаментінде 300 қыз келіншек еңбек етеді. Олар ел аумағындағы әуежай мен теміржол қауіпсіздігіне жауапты. Бір қолымен бесік тербетсе, екінші қолымен әлемді әлдилейтін әйелдер мұнда қызметіне де, отбасына шаруасына да үлгеріп, өзгелерге үлгі болып жүр.