Қызылордада Біріккен Ұлттар Ұйымының ұйытқысымен «URBAN-2025» халықаралық форумы өтті. Бұл ауқымды шара Қазақстанда алғаш рет ұйымдастырылды. Сыр өңірінің урбанизация үдерісін шетелдік сарапшылар бағамдап, жаһандық даму жолындағы озық тәжірибелерді ортаға салды.

Қызылорда мегаполис емес. Бірақ құрылыс қарқын алып, әлеуметтік-экономикалық өсімі артқан бірден-бір қала. Тұрғындардың өмір сүру деңгейін жақсарту, өңірде экологиялық тепе-теңдікті сақтау бағытында біршама ауқымды жобалар қолға алынған. Мәселен, шаһарда салынып жатқан жаңа жылу-электр орталығы іске қосылса, облыс электр энергиясына тәуелділіктен арылады.

Нұрлыбек Нәлібаев, облыс әкімі:

Қазіргі таңда облыс бюджеті 750 млрд теңгеден асты. Бұл қаражат аймақтағы ең өзекті деген мәселелерді шешуге, тұрғындардың өмір сүру сапасын жақсартуға, ауқымды инфрақұрылымдық жобаларды іске асыруға бағытталды.

Форум аясында түрлі тақырыпта секцялық отырыстар өтті. Онда Қазақстанда инклюзивті және климатқа төзімді қалаларды қалыптастыру, құрғақ аймақтарда климатты жақсарту бағытында тың идеялар айтылды. Әсіресе, халықаралық ұйымдар облыстағы байыпты бастамаларға қолдау көрсетуге әзір.

Юрий Милевский, «Novaya Labs» жоба-сараптамалық компаниясының директоры:

Қызылорда сындарлы өзгерістердің алдында тұр. Өңірдің қазіргі әлеуеті жақсы. Бірақ жаһандық климаттық өзгеріс, су тапшылығы секілді мәселелерді келешекте қолға алу керек. Біздің компанияның бұл бағытта Африка елдерінде мол тәжірибесі бар. Сондықтан, біз Қызылорда облысымен тығыз байланыс орнатып, үлкен жобаларды бірлесіп жүзеге асыруға дайынбыз.

Біріккен Ұлттар Ұйымының Қазақстандағы өкілдігі қашанда өңірлерді дамытуға қол ұшын созып, экологиялық жобаларды қаржыландырып келеді. Бұл жолы белді ұйымның серіктесі UN-Habitat ұйымы басшысы мен Қызылорда облысының әкімі ортақ декларацияға қол қойды.

Әділбек Серікұлы