0:00:00

Жаңалықтарды Telegram арнамыздан оқыңыз !

Халықаралық панорамаға байланысты бірер сөз.

АҚШ президенті Д.Трамп пен оның командасы соғысты, дәлірегі — ұрыс қимылдарын жылдам тоқтату өте қиын шаруа екенін түсіне бастағанға ұқсайды. Тек Киевке қысым көрсетумен мәселе шешілмейтінін.

Иә біз Ақ үй үшін соғысты кім бастағаны, агрессордың кім екені аса маңызды еместігін түсіндік. Алайда агрессордың айылын жидырмай, оқ ату тоқтамайтыны санасына жеткен сияқты. Жұмаға қараған түні Ресей Украинаны зымырандар және басқарылатын ұшу қондырғыларымен ауқымды түрде атқылаған.

Д.Трамп өзінің әлеуметтік желісінде «Ресейдің әскери құрылымдары Украинаны талқандап жатыр, Ресейге қарсы ауқымды санкциялар салуды кәдімгідей қарастырып отырмыз» деп жазды.

Бірақ «қарастырып отырмыз» дегенмен Украинаға барлық көмекті, ең бастысы қару-жарақ, әскери техника беруді тоқтатып тастап, барлау мәліметтерін бермеудің арасы жер мен көктей. Еуропа лидерлерінің қайта-қайта САММИТ өткізуі де жағдайдың мәз еместігін көрсетеді.

Сауда-саттық, экономикалық байланыстарды реттеп келген ЕуроОдақтың «ақ жағалы» кеңселері әскери одақ құрып, қарулану мәселесімен айналысуы әп-сәтте іске аспайды. ЕуроОдақтың миссиясы таза бизнес деуге болады. Себебі Еуропа қауіпсіздік бойынша Солтүстік альянс одағына арқа сүйеп келді. Ал Солтүстік альянс одағы НАТО АҚШ үшін енді маңызды одақ болмайтын сияқты. Әлемдегі тиктоникалық өзгерістер жайлы кейбір сарапшылар бекер айтып жатқан жоқ.

Екінші дүниежүзілік соғыстан кейінгі қағидалар мен ережелердің іргетасы қақырап жатқандай. Тәуелсіздік, әділет, күштінің әлсізге өктемдігін ұстап тұру тәрізді гуманизм тармақтары «қатталып, архивке өткізіліп» жатқан сияқты әсердеміз...