Қазақстан қор биржасындағы (KASE) 21 шілдедегі күндізгі сауда нәтижесінде доллардың орташа сараланған бағамы 529,44 теңге болды, бұл алдыңғы күнмен салыстырғанда 3,89 теңгеге төмендеген,- деп хабарлайды Massaget.kz тілшісі.

Айта кетсек, Ұлттық банктің ресми бағамы да жарияланды – 21 шілде күні 1 АҚШ доллары 533,61 теңге деп белгіленген.

Kurs.kz деректеріне сәйкес, Алматыдағы айырбастау пунктерінде долларды орташа есеппен 529,55 теңгеден сатып алып, 531,49 теңгеден сатып жатыр.

Астанада сатып алу бағасы – 527,55 теңге, сату – 534,52 теңге шамасында.

Үкімет пен Ұлттық банк не дейді?

Бұған дейін Премьер-министр Олжас Бектенов журналистердің теңге бағамына және девальвация қаупіне қатысты сұрағына жауап берген болатын. Оның айтуынша, қазіргі валюта бағамы тек нарықтық факторлар негізінде қалыптасады, Ұлттық банк тарапынан ешқандай араласу жоқ.

"Курс бізде нарықтық жағдайларға байланысты қалыптасады. Ұлттық банк тарапынан араласу жоқ. Қазіргі таңда, біздің және жетекші сарапшылардың бағалауынша, теңгенің күрт әлсіреуіне алғышарттар жоқ", – деді Үкімет басшысы.

Кейін Ұлттық банк төрағасының орынбасары Әлия Молдабекова да теңге бағамының қазіргі жағдайына түсініктеме беріп, реттеуші органның валюта нарығына неге араласпайтынын түсіндірді.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!