Алматы облысына қарасты Қарасай ауданындағы таулы аумақта өрт шықты, — деп хабарлайды Massaget.kz тілшісі.

Төтенше жағдайлар министрлігінің мәліметінше, өрт Долан ауылы маңындағы таулы аймақтағы құрғақ шөп пен бұталардың тұтануынан басталған.

Өртті сөндіруге Алматы облысы мен Алматы қаласының төтенше жағдайлар департаментінен, Іле-Алатау мемлекеттік ұлттық паркінен, жергілікті атқарушы органдардан және ТЖМ-нің 28237 әскери бөлімінен 100-ден аса адам мен 20 техника бірлігі жұмылдырылды. "Қазавиақұтқару" АҚ-ның тікұшағы су төгетін құрылғы арқылы су шашу жұмыстарын жүргізді.

Сөндіру жұмыстарының жүргізілуіне рельефтің күрделілігі, өрт аумағына апаратын жолдың болмауы, сондай-ақ биік шөп пен қалың бұтаның көп болғаны кедергі келтірген.

Соған қарамастан, ТЖМ өрттің сөндірілгенін хабарлады. Жалпы өрт аумағы 40 гектар болды. Тікұшақпен 8 рет су төгілді (24 тонна). Зардап шеккендер жоқ.

Қызықты жаңалықтар мен видеоларды көру үшін TikTok арнамызға жазылыңыз!