Павлодар облысының құтқару қызметі өзен-көлдерді әуеден бақылап, демалушылардың қауіпсіздігін қамтамасыз етуде, деп хабарлайды 24kz.

Облыстық Төтенше жағдайлар департаменті дауыс зорайтқышпен жабдықталған ұшқышсыз ұшатын аппарат сатып алды. Заманауи құрылғының біреуі 13 миллион теңге тұрады.

«Алдағы уақытта туристік аумақтарға да аламыз», — дейді мамандар. Құтқарушылар үлкендердің қарауынсыз жүрген балаларды да аппараттың көмегімен тауып, қажет болса жедел көмекке келеді. Жалпы құтқару қызметі жыл басынан бері 121 адамға көмек көрсеткен. 19 адамды судан құтқарып қалған. Өкінішке қарай шомылу маусымы басталғалы 7 адам суға кетті.

Рүстембек Амрин, облыстық ТЖД бастығы:

- Ұшқышсыз ұшу құрылғысы бізге оқыс оқиға болған жерге жедел жетуге мүмкіндік береді. Судағы беймәлім затты қашықтан анықтай аламыз. Ол қиын жағдайға душар болған адам болуы да мүмкін. Осы дронның арқасында жедел әрекет ету тобына дереу хабарлама түседі.