Құқық қорғаушылар сайысына әр өңірден іріктелген 40 полицей қатысты, деп хабарлайды 24kz.

Үздіктер бүгін Ішкі істер министрлігінің республикалық слетында марапатталды. Шара «Заң және тәртіп» жобасы аясында ұйымдастырылды.

Құқық қорғаушылардың республикалық слетында семинар, шеберлік сағаттары мен экскурсия және сала ардагерлерімен кездесу ұйымдастырылды. «Мақсат – тәртіп сақшыларының қоғамдағы оң иммиджін нығайтып, өзара тәжірибе алмасу арқылы кәсіби деңгейін арттыру», — дейді ұйымдастырушылар.

Қайсар Сұлтанбаев, ІІМ Әкімшілік полиция комитетінің төрағасы:

- Халықпен бірге ең бірінші шепте жұмыс жасайтын осы біздің қызметкерлер. Қоғам алдында, жалпы мемлекет ішінде абыройын көтеріп, бұлардың еңбектерінің тиісті бағасын беріп, барлығы танитындай деңгейге көтеру ол біздің осы бүгінгі өтіп жатқан слеттың басты идеяларының бірі деп айтуға болады.

Слет аясында учаскелік полицейлер мен кәмелетке толмағандар істері жөніндегі инспекторлардың байқауы өтті. Оған әр өңірден келген үздік 40 қызметкер қатысты. Сайыстың алғашқы кезеңінде мамандардың білім деңгейі мен Конституция, Ішкі істер органдары туралы және жемқорлыққа қарсы заңды қаншалықты жақсы білетіні сыналды. Одан соң нысана ату мен физикалық дайындығы тексерілді. Нәтижесінде екі аталым бойынша да жамбылдық тәртіп сақшылары Эльмира Байниязова мен Азизжон Пайзиев үздік атанды.

Эльмира Байниязова, Тараз қалалық №2 полиция бөлімі ювеналды полиция тобының капитаны:

- Автокөлік және мойор шенін беріп отыр. Бұл мемлекет тарапынан бізге деген үлкен қолдау деп сенемін. Өйткені біз осы қолдау, демеу арқылы алға қарай ұмтылып, әрі қарай қылмыстық құқық бұзушылықтардың жолын кесу мақсатында өз үлесімізді жоғары деңгейде көрсетуге бір серпін беретіндей болды.

Бірінші орын алған қызметкерлерге полицияның жоғары шені берілді. Оған қоса, су жаңа қызметтік көлік табысталды. Ал екінші орын алған қатысушылар «Құқық тәртібін қамтамасыз етуде зор үлес қосқаны үшін» деген мемлекеттік марапатқа ие болды. Үздік үштікті түйіндегендерге министрдің алғыс хаты табысталды.

Авторлары: Мерей Бает Бақытжан Бапаев