Елімізде үш ауысымды мектептер саны 4 есе және апатты жағдайдағы білім ордалары 2 есе азайды, деп хабарлайды 24kz.

Ал оқушы орындарының тапшылығы 4 есе қысқарды. Бұл ілгерілеу бірінші кезекте өңірлерде ашылып жатқан «Келешек мектептерінің» нәтижесі дейді ұстаздар қауымы.

Мирлан Алтынбек, тілші:

- Соңғы жылдары елде балалардың білім алуына қолайлы жағдай жасау бағытында елеулі ілгерілеу байқалады. Мемлекет басшысының тапсырмасына сәйкес 2019 жылдан бері 1 млн астам оқушыға арналған 1200 мектеп салынды. Тек 2023-2024 жылдары 510 мың орынға арналған 422 жаңа мектеп ашылды. Жаңа оқу жылының қарсаңында өңірлерде 115 мың оқушыға арналған тағы 83 жаңа мектеп пайдалануға берілді. Оның 57-сі «Келешек мектептері» ұлттық жобасы аясында салынған.

Есенбек Серкебаев, «Amanat» партиясы «Бірлік» аумақтық филиалының атқарушы хатшысы:

- Біздің сайлауалды бағдарламамыздың аясында көптеген мектепте күрделі жөндеулер жүргізіліп, үш ауысымды мектептер мәселесін шешу мақсатында бүгіннің өзінде бірнеше жаңа мектеп өз есіктерін ашқалы тұр.

Жаңа мектептердің пайдалануға берілуі Алматы, Шымкент қалаларында, Ақмола, Қарағанды және Қызылорда облыстарында үш ауысымды оқыту мәселесін толығымен жоюға мүмкіндік берді. Бүгінде елде 3 мың мектеп бір ауысымда, 5 мыңнан астам мектеп екі ауысымда жұмыс істейді.

Ақзира Қасымова, ҚР Оқу-ағарту министрлігі техникалық және кәсіптік білім департаменті директорының орынбасары:

- Былтырғы жылы 422 мектеп пайдалануға берілсе, оның ішінде «Келешек мектептері» мынау алдымызда тұрған. Сонымен қатар қазірдің өзінде 149 мектеп салынып жатыр. 245 мектепке күрделі жөндеу жұмыстары жүргізілді. Бұл біздің балаларға барлық қолайлы жағдай жасалған деген сөз. Сапалы білім алу үшін жасалып жатқан жағдай деп атауға болады. Сонымен қатар мұғалімдерді қолдау бағытында да Оқу-ағарту министрлігімен көптеген жұмыс жүргізіп жатырмыз.

Мирлан Алтынбек, тілші:

- 2025-2026 оқу жылында елімізде жалпы сыйымдылығы 267 мың оқушыға арналған 232 жаңа мектеп салынады. Сонымен қатар 245 мектеп жаңғыртудан, тағы 1 мың ауыл мектебі модернизациядан өтеді, ал 680 мектепке 1100 заманауи пәндік кабинет орнатылады.

Набира Қажығалиева, Астана қаласы әкімдігінің №102 орта мектебі IT бөлімінің меңгерушісі:

- Жалпы біздің № 102 «Келешек мектебі» 2024-2025 оқу жылы өзінің білім алушыларына есігін айқара ашты. 1 жыл ішінде мектебіміздің ауыз толтырып айтарлықтай жетістігі көп. Біз ұстарымыздың, білім алушыларымыздың жетістіктерін қуана айта аламыз. Мектебіміз елорда төрінен ойып тұрып орын алды. Себебі бұл жерде баланың жайлы білім алуына жайлы орта болып табылады.

Жыл соңына дейін 140 мың орынға арналған тағы 111 мектептің құрылысы аяқталады. Жоғарыда аталған жобалардың жүзеге асырылуы еліміздің көптеген өңірінде үш ауысымды оқытуды жоюға және қосымша 150 мың орын тапшылығын қысқартуға мүмкіндік береді.

Авторлары: Мирлан Алтынбек, Ғалымжан Абдылахат