Түркістан облысындағы Қызылкөл ауылдық балабақшасында бөбектерді еңбек етуге баулиды.

Тәрбиешілер мен балалар еккен бау-бақша жайқалып тұр. Жеміс ағаштары мен бақша дақылдарын балалар күтіп баптайды. Піскен өнімді де өздері жинайды. Қазір ауылдың 50 бүлдіршіні еңбек етіп, жемісін көріп жүр.

Балабақша меңгерушісі Нұржамал Төлеуова бастаған ұжым бөбекжайды жасыл-желекке көмкеріп, бау-бақшысын жайқалтып отыр. Бүлдіршіндерге тәрбие беріп қана қоймай, оларға бақша дақылдарын күтіп баптауды да үйретеді.

5 жасар Медина тәрбиешісінің айтуымен аптасына екі рет өзі еккен дақылдарға су құйып тұрады. Ойын баласы өзі құралпы бүлдіршіндермен бірге піскен өнімдері жинайды.

Медина Төлен, балабақша тәрбиеленушісі:

- Біз бақшада тек жазу ғана жазбаймыз. Қауын-қарбызды өсіруді үйренеміз. Қызылша егеміз, сәбіз егеміз. Бұның бәрін өзіміз өсіреміз.

Мұнда тәрбиеленіп жатқан бүлдіршіндердің барлығы табиғатқа жақын. Балабақшада көргенін үйіне айтып барады. «Ата-аналар баламыз бақшадан келгенде «біздің үйде неге алма жоқ, неге қауын-қарбыз екпейміз» деп, қолқа салады», — дейді.

Ақтолқын Файзуллаева, қала тұрғыны:

- Біздің балаларымыз балабақшада топырақты баптауды, қалай егуді, қалай суаруын, соның барлығын көреді. Үйге барғаннан кейін бізге ұсыныс айтады. «Біз бүгін балабақшада қауын егіп келдік, қызанақ ектік» деп. Соны демалыс күндері баламыздың айтуыменен үйде егеміз. Оның барлығы тәрбие.

Нұржамал Төлеуова бұл мекемені 17 жылдан бері басқарады. Балабақшаның басты бағыты — баланы еңбекке баулу, оның ішінде үлкендердің еңбегін бағалауға үйрету,-дейді. Бөбекжай «өз жемісімізді өзіміз өсіреміз» деген қағидамен жұмыс істейтінін айтады.

Нұржамал Төлеуова, балабақша меңгерушісі:

- Мұнда барлық жеміс түрлері егіледі. Қыстай қамбаға сақтаймыз. Мысалға кортошканы егетін болсақ, оны балалардың өздеріне тастатамыз. Сосын оны суғарғанын көрсетеміз, гүлдейді, оны көреді. Бір күні «ал енді балалар картошкамыз пісті» дейміз. Олар өздері еккен дақылды біледі. Картошканы қазып алып, атсындағы өнімін алған кезде баланың қуанғанын көрсеңіз. Айтуға тіл жетпейді. Бұндағы басты бағыт — баланы еңбекке баулу, адал еңбектің дәмін татып өссе екен дейміз.

Бүлдіршіндер ұлтжанды, еңбексүйгіш, адал азамат болып өсіп жатса, ол — балабақша ұжымының төккен тері мен еткен еңбегінің жанғаны. Нұржамал Құлжабайқызы мына жеміс ағаштарын отырғызған балаларымыздың алды қазір ЖОО-ның 3-4 курсында оқиды,-дейді. Өзі баптаған шәкірттерінің де елге жемісті еңбек ететініне сенімді.

Жандос Жұмбаек, Ерболат Әбіш, Қуаныш Әбуов, 24KZ