Ғылым және жоғары білім министрі Саясат Нұрбек Үкіметте өткен тікелей эфирде қолын күйдіріп алды, деп хабарлайды Skifnews.kz ақпарат порталы.

Ол Үкімет отырысынан кейін өткен брифингте физикалық қасиеттері бар кабельдерді өндіруге мүмкіндігіміз бар екенін көрсетіп, оны тәжірибе жүзінде көрсетті.

Министр Нұрбек қолындағы кабелі отқа төзімді екенін айтты.

"От, түрлі апаттар кез келген ғимараттарда кабельдердің салдарынан болады. Электр қуаты өшіп қалғанда немесе тұйықталу жағдайларында от кабельдерден шығады. Сондықтан еліміздің ғалымдары бірігіп, жанбайтын, отқа төзімді, жоғары-төмен температураларға төзімді, радиацияларды өткізбейтін және басқа да түрлі қасиеттері бар кабельдерді шығаруға өз үлестерін қосты", — деді ол.

Саясат Нұрбек қолындағы кабелін отпен жандырып, бірнеше уақыт бойы тұрды. Тәжірибеде көрсетіп жатқанында министр өзінің қолын күйдіріп алды.