Бренд көліктері Қазақстанда 2025 жылдың екінші тоқсанында сатыла бастайды.

Қытайдың Lynk & Co компаниясы Қазақстан нарығына шығу мақсатында Orbis Аuto құрылымына кіретін қазақстандық Lynk Auto компаниясымен келісім жасасты. Оның аясында биылдың ІІ тоқсанынан бастап Қазақстанда, атап айтқанда Астана, Алматы және Шымкент қалаларындағы автосалондарда Lynk & Co маркалы көліктер сатыла бастайды.

Бастапқы кезеңде бренд екі көлік түрін сатылымға шығарады, олар – Lynk & Co 03 спорттық седаны және Lynk & Co 09 кроссовері. Дегенмен, кейін Қазақстан нарығында сатылатын көлік маркаларын кеңейту жоспарланып отыр.

Айта кетейік, бренд Қытайда Lynk & Co маркасының 10 моделін шығарады. 2016 жылдан бері барлығы 1,3 миллионнан астам көлік жасалып, сатылған.

Orbis Auto автомобиль тобының бас директоры Динара Искакованың айтуынша, бұл – жай автомобиль бренді ғана емес, бұл инновацияны, жайлылықты және озық технологияны біріктіретін ұтқырлықтың жаңа буынының символы.

"Lynk & Co автомобильдері стильді, динамиканы және жайлылықтың жоғары деңгейін бағалайтын заманауи жүргізушілерге, сондай-ақ өзгелерден ерекше болуға аса мән беретін адамдарға арналған, себебі бренд өзінің жарқын және теңдестірілген дизайнымен әдеттегі автомобильдерден өзгеше екені анық", – деді ол.

Оқи отырыңыз: Қытайда көліктердің тым тез жаңарып жатқанына қарсы бейбіт шеру өтті

Еске салайық, 2024 жыл қорытындысы бойынша Қазақстанда сатылған Қытай көліктерінің көрсеткіші рекордтық мәнге ие болды. Қазақстанда сатылған үздік маркалардың ондығының жартысынан астамын қытайлық брендтер құрады. 2024 жылы Қазақстанда 205 мыңнан астам көлік сатылып, бұл 2023 жылмен салыстырғанда 7 мыңға артық болса, сарапшылар өсімге қытай көліктерінің Қазақстан нарығына көптеп келуі себеп екенін айтады.