Елде де әуе компанияларына шағым көп. Күні кеше Астанадан Қостанайға бет алған FlyArystan ұшағы межелі жеріне жете алмай, қайта айналып келді. Бұған Қостанайдағы қолайсыз ауа райы себеп, әуе кемесін қауіпсіз қондыру мүмкін болмаған.

Бұл жайтты компанияның баспасөз қызметі де растады. Алайда күн райы ашылған соң ұшақ қайта ұшты. Дегенмен соңғы уақытта халықтың әуе компанияларға деген өкпесі қара қазандай. Жолаушылар рейстердің жиі кідіріп, сағаттап күттіретініне наразы.

Алматы тұрғыны Екатерина Орлова отандық әуе компанияларының қызметін жиі пайдаланады. Ол кішігірім кідірістерге мән бермейтін. Алайда соңғы жағдай шыдамының шегіне жеткен.

Тоғыз айлық қызымен ұшуға шыққан рейсі төрт сағатқа бөгеліп, әуе компаниясынан ешқандай түсініктеме ала алмапты.

Екатерина Орлова, Алматы қаласының тұрғыны:

- Мен енді ешқашан Fly Arystan компаниясымен ұшпаймын! Рейстің бөгелгені аздай, бізге бір ауыз мардымды жауап айтқан жоқ. Бесіктен белі шықпаған баламен күтіп отыру қиын болды. Әуе компаниясы бізге су да, тамақ та ұсынған жоқ.

Әлеуметтік желіде де жолаушылар тарапынан шағым қарша борауда.

Мәселен, Жансая Омарова әкесінің көз жұмуына байланысты Алматыға алған әуе билетін қайтарғысы келген. Алайда әуе компаниясы билет құнын өтеуден бас тартқан.

Мәселені анықтау үшін, Fly Arysran компаниясының баспасөз қызметіне хабарласқан едік. Алайда компания өкілдері сұқбат беруден бас тартты. Десе де шағымның көптігі рас. Оны авицация әкімшілігі де растап отыр.

Всеволод Ким, «Қазақстанның Авиациялық Әкімшілігі» АҚ Департаментінің бас авиациялық инспекторы:

- 6 қазаннан бастап, әуе компанияларының қызметін тексеруді қолға алдық. Негізінен жолаушылар Fly Arystan компаниясына көп шағымданды. Бұл әрине рейстер мен жолаушылар ағыны көптігіне де байланысты екенін мойындауымыз керек. Жалпы ережелерге сәйкес жолаушылардың құқығын бұзған әуе компанияларына 150 айлық есептік көрсеткіш көлемінде әкімшілік жауапкершілік қарастырылған.

Ведомство өкілдері жолаушыларға құқық бұзушылық анықталған жағдайда барлық дәлелдерді жинап, ресми шағым түсіруге кеңес береді.

Авторлары: Дана Әлиева, Руслан Тәуірше