Жыл басында депутаттардың өңірлерге сапары барысында тұрғындар 700-ге жуық проблемалық мәселе көтерді, деп хабарлайды 24kz.

Олардың басым көбі денсаулық сақтау, білім беру, жұмыспен қамту секілді әлеуметтік түйткілдерге қатысты. Жұртшылықпен өткен кездесуде ауыл шаруашылығы, өнеркәсіп, құрылыс, энергетика және өзге салаларда қордаланған мәселелер талқыланды. Үкімет келіп түскен барлық сұрақты қарап, саралаған. Атқарылған жұмыстардың есебін Премьер-министрдің орынбасары Ермек Көшербаев Мәжіліс отырысында баяндады. Ол жергілікті тұрғындармен тығыз кері байланыс басым бағыттарды айқындап, тиісті шешім қабылдауға көмектесетінін атап өтті. Сондай-ақ Мәжіліс төрағасы Ерлан Қошанов: «Әр мәселенің артында азаматтардың аманаты тұрғанын айтып, Үкіметпен бірлесіп жұмысты әрі қарай жалғастыруымыз керек», — деді.

Ерлан Қошанов, ҚР Парламенті Мәжілісінің төрағасы:

- Тұрғындар көтерген түйткілді проблемалар Үкімет деңгейінде талқыланып, ең бастысы, біз ортақ шешімдер тауып келе жатырмыз. Сол шешіліп жатқан мәселелердің бірқатарын ғана қысқаша атап өткім келеді. Мысалы, өңірлерге сапарымыз кезінде ең жиі көтерілген мәселенің бірі – зиянды өндірісте жұмыс істейтін адамдардың жағдайы еді. Бұл жылдар бойы айтылып келді. Былтыр сол түйткіл шешімін тапты. Депутаттар ауыл-аймақты аралағанда балалардың құқықығын қорғау мәселесі жиі көтерілді. «Әсіресе, балабақшаларға талаптарды күшейту керек» деген өтініштер айтылды. Соған байланысты депутаттар Үкіметпен бірге тығыз жұмыс істеп, балабақшаларға лицензия беру тәртібі қайтарылды.