Кейінгі жылдары елде стоматология көбейді. Жылдың басында ғана алты мыңға жуық субъект тіркелген. Бұл 12%-ға артық , деп хабарлайды 24kz.

Тіс емдеушілердің табысы да тұрақты түрде өсіп жатыр. Былтыр 210 млрд теңгеге жуық қызмет көрсетілді

Жеке стоматологтардың табысы артты

Былтыр отандық стоматологтар 19,3 млн доллардың жабдығын импорттады. Бұл — алты жылдағы рекордтық көрсеткіш. Саладағы шығынның басым бөлігі заманауи құрылғыларды сатып алуға кетеді. Соған қарамастан, табыс кемімеген. Былтыр стоматологтардың кірісі 1,5 есе өсіп, 210 млрд теңгеге жуықтады. «Бұл да рекорд», - дейді сарапшылар. Тұрақты өсімге зейнетақы жинағының да ықпалы бар. Стоматологиядағы негізгі табыстың 80%-ы халықтың есебінен түседі. Сонымен қатар қызмет ақысы жыл сайын орташа алғанда 11,5% артып отырған.

Денталдық туризмнің әлеуеті зор

Әрине, кей қызмет түрлері қарапайым қазақстандықтарға қолжетімсіз болуы мүмкін. Ал шетелдік науқастар үшін тиімді екен. Елде денталдық туризм дамып жатыр. Отандық емханалар жыл сайын жүздеген шетелдіктің тісін емдейді. Көбіне тісті жұлу немесе протездеу қызметі де сұраныста. Себебі бағасы өзге елдермен салыстырғанда қолжетімді. Алдыңғы қатарлы технология да бізде бар. Стоматологтар бірлестігінің президенті Мейрам Раганиннің айтуынша, дәрігерлердің біліктілігі де жоғары. Шетелдік науқастарға Астана, Алматы, Шымкент қалаларында қызмет көрсетілді. Олардың арысы – Германия, Америка, Англиядан болса, берісі – көршілес Өзбекстан мен Қырғызстаннан. Бір жылда келушілер қатары үш есе өсті. Жалпы былтыр елге екі мыңнан аса медициналық турист келді. Оларға кардиохирургия, онкология және ортопедиялық қызметтер де көрсетілді.

Мейрам Раганин, стоматологтар бірлестігінің президенті:

- Өткен жылы елге келген шетелдіктер өте көп болды. Мысалы, АҚШ азаматтары 40 адам, Англиядан 21 адам, Германиядан 126 науқас, Ресейден 58, Украинадан 12 тұрғын келді. Бұл мемлекеттерден бөлек, Италия, Қытай, Польша, Бельгия, Түркиядан да келушілер бар. Қазақстанның шекаралық аймағына, әсіресе ресейлік азаматтардың ағылуы жиілеген. Тиімді қолжетімді қызмет түрін алып өз елдеріне қайтып кету оларға жеңілірек. Сұраныс жаз айларында көбіне өседі.

БЖЗҚ: Жинақ есебінен тісін емдететіндер көбейді

Өткен айда қазақстандықтар денсаулығын түзеу үшін зейнетақы қорынан 33 млрд теңге алды. Бұл мақсатқа 32 мыңнан асатын өтінім түскен. Мақұлданған қаражат көлемі қаңтарға қарағанда 9%-ке көп. Оның дені тісін емдетем дегендерге беріліпті. Жалпы зейнетақы қаржысын тиімді пайдалану үшін әрі ашықтықты қамту үшін реформа енгізу көзделеді. Мәселен тісіңізді емдетуге қаржы бөлмес бұрын рентген нәтижесі сұралуы мүмкін. Бұл алаяқтықтың жолын кесуге бағытталған.