Биылғы көрісу күні Орал қаласында да мазмұнды шаралармен айшықталды, деп хабарлайды 24kz.

Қоғамдық көліктерде, мәдениет ошақтарында, білім беру ұйымдарында мейрамның мән-маңызы кеңінен насихатталды.

Ерденбек Жылқайдарұлы, тілші:

- Бабадан жеткен байырғы дәстүр бойынша батыста 14 наурызда дәл осылай амандасады. Бұл күні жасы кішілер жасы үлкен көрші-көлемге, тума-туысқа, елдің естілеріне ертемен барып қос қолдап көріседі, хал-жағдайын сұрасады. Қытымыр қыстан құтылып, шуақты көктемге аяқ басқан ағайынның аузы аққа тиіп, арқа-жарқа болысады. Көпшіліктің көңілі жадырап, арадағы өкпе-наз кешіріледі. Бүгін де Жайықтың бойын жайлаған жұртшылық жылдағы дағдыдан жаңылмай, үлкендерге барып амандасуда. Мекеме-ұйымдарда мерекенің маңызын ашатын түрлі шаралар ұйымдастырылып жатыр. Біз қазір облыстық өлкетану мұражайындамыз. Музей ауласында көріп тұрғандарыңыздай екі ақшаңқан киіз үй тігілген, ошақ жайнап, қазан қайнап, ән-күй ойнап жатыр. Осы жерге мәдениет саласының ардагерлері, зиялы қауым өкілдері жиылған.

Жалпы «Көрісу» мейрамының көне дәуірден келе жатқан тойлану үрдісіне қарасаңыз, ізгілік пен мейірімге толы. Үлкендерге сәлем беру, көптен көріспеген ағайындардың амандығын білу, ақ тілек арнаудың өзі халықты береке-бірлікке, ынтымаққа шақырады. Сондықтан осы мерекенің қоғамдағы орнын айшықтап, ұмытылып бара жатқан ұлттық салт-дәстүр, әдет- ғұрыпты жаңғырту қажет.