Жаңалықтарды Telegram арнамыздан оқыңыз !

Елімізде «IteachMe» жобасы аясында мүгедектігі бар 1000-ға жуық азамат жұмысқа орналасқан. Қоғамдық қор арнайы курстар ұйымдастыру арқылы кембағал жандарға заманауи мамандықтарды меңгеруге мүмкіндік береді. Олардың ортаға бейімделіп, өзінің жаңа қабілетін ашуына көмектеседі.

«IteachMe» жобасы аясында мол мүмкіндіктерге қол жеткізгеннің бірі – Сапақ Ұлпан. Арбаға таңылса да, адал еңбегімен ақша тауып жүр. 27 жастағы бойжеткен осыдан 4 жыл бұрын осы қоғамдық қордың «моушн дизайнер» курсын оқыған. Зейін қойып, білек сыбана іске кіріскен қыз бүгінде саладағы білікті маманға айналды.

Ұлпан Сапақ, І топтағы мүгедек:

Бұл қор маған үлкен жаңа мүмкіндіктер беріп, өзімнің жаңа қабілеттерімді ашып, қалай айтсам өзімнің жаңа нұсқамды құрдым. Тек қана қоғамдық қорда емес, фриланс форматында да қаржы табамын.

Қоғамдық қорға биыл 5 жыл толды. Осыған дейін 2000-нан аса түлек оқуды сәтті аяқтаған. Курсқа қатысушылар негізінен заман ағымына сай цифрлық мамандықтарды үйренеді. Мәселен, бағдарламалау тілі, код қою, смм, копирайтинг, мобилография және дизайнер деген сияқты.

Захира Бегалиева, «Itech me» қоғамдық қорының жетекшісі;

Олар 3,5 айдың ішінде неше түрлі осындай курсты үйреніп, кейін өздерінің курс жұмысын қорғайды. Сосын жұмысқа тұрғызамыз. Олардың портфолиосын жасап береміз. Оларды адамдармен сөйлесіп, жұмысқа тұруына көмектесіп, айлық алуына көмектесеміз.

Оқыту курстары қазақ, орыс және ым тілінде өткізіледі. Қолдауға ие болған жастар алдағы уақытта инновациялық жобаларымен еліміздің IT саласына елеулі үлес қоспақ.

Ернұр Медет