Қазақстан-Британ техникалық университеті (ҚБТУ) енді мемлекет меншігінде.

Бұған дейін университеттің жалғыз акционері – экс-президенттің қызы Динара Құлыбаеваға тиесілі «Нұрсұлтан Назарбаев білім қоры» болған.

27 ақпаннан бастап ҚБТУ-дың жаңа иесі ретінде «Қайтарылған активтерді басқару компаниясы» тіркелді.

Бұл компания заңсыз иеленіп, кейін мемлекетке қайтарылған активтерді басқарады.

Осылайша, кезінде 11,3 млрд теңгеге жекешелендірілген беделді оқу орны қайтадан халық игілігіне жұмыс істейтін болды.

Еске сала кетейік, 2023 жылы 27 маусымда өткен ҚР Парламенті Мәжілісінің жалпы отырысында Мәжіліс депутаты, “Ақ жол” фракциясы мүшесі Қазыбек Иса халық қазынасын халыққа қайтару мақсатында Қасиетті Тәуелсіздікті жариялаған Жоғары Кеңестің тарихи ғимаратын отбасыдан отанға қайтару керектігін көтерген еді.