Грекияның Коста-Наварино қаласында өткен Халықаралық Олимпиада комитетінің (ХОК) 144-ші сессиясында 2028 жылы Лос-Анджелесте өтетін Олимпиада ойындарының бағдарламасына боксты қосу туралы шешім қабылданды, деп хабарлайды Skifnews.kz ақпарат порталы.

"ХОК-ның боксты Лос-Анджелес Олимпиадасының бағдарламасына қосу туралы шешімі – World Boxing пен бүкіл Олимпиада комиссиясының мақсатты жұмысының көптен күткен нәтижесі. Бұл – мыңдаған спортшының арманын сақтап қалу деген сөз. Мен Олимпиада ойындарының жүлдегері ретінде мұның болашақ буын спортшылары үшін қаншалықты маңызды екенін түсінемін. Олимпиада – жай ғана жарыс емес, бұл – үміттің символы, шеберлікке ұмтылу және әлемге өзіңді көрсету мүмкіндігі.

Біз бокстың бай тарихы мен дәстүрін Олимпиада бағдарламасында сақтау үшін қадам сайын еңбек еттік. Әрбір жас спортшы өз елінің туын желбіретіп, Олимпиада тұғырына көтеріле алуы тиіс.

Алда әлі көп жұмыс күтіп тұр, біз бұл жауапкершілікті толық сезінеміз. World Boxing әділ төрешілік пен спортшыларды іріктеу үдерісінің ашықтығын қамтамасыз ету үшін бар күшін салады", — деді Олимпиада комиссиясының төрағасы Геннадий Головкин.

Сондай-ақ Геннадий Головкиннің айтуынша, World Boxing бұрынғыдай ашықтық пен әділдік қағидаларын ұстанып, әрбір боксшының тең құқықтары мен мүмкіндіктерін қамтамасыз етуге баса назар аударады.

ҰОК-тың мәліметінше, бастапқыда бокс 2022 жылдың ақпанында 2028 жылғы Олимпиада ойындарының жарыс бағдарламасынан шығарылған.

Бұл шешім Халықаралық бокс қауымдастығы (IBA) төңірегінде туындаған мәселелерге байланысты қабылданған. 2023 жылдың маусымында ХОК IBA-ның ресми мойындауын толықтай қайтарып алғаннан кейін, бокстың Олимпиададағы болашағы белгісіз болып қалған.

2024 жылғы Париж Олимпиадасында бокс жарыстары ХОК-ның арнайы жұмыс тобының қадағалауымен өтті, бұл спорттың Олимпиадалық қозғалыс үшін маңыздылығын тағы бір мәрте дәлелдеген.

Олимпиадалық бокстың жаңа даму кезеңінде басқару 2023 жылы құрылған World Boxing Халықаралық бокс федерациясына жүктелді. Қазіргі таңда бұл ұйымға 84 ұлттық федерация мүше. Жуырда ХОК World Boxing-ты уақытша мойындап, ұйым әлемдік деңгейде боксты дамыту құқығына ие болды.