0:00:00

Жаңалықтарды Telegram арнамыздан оқыңыз!

Жер дүние жаңарып, оның сәні мен мәнін паш етер Наурыз мерекесі Ресей астанасында да атап өтілді. Мәскеудегі «Қазақстан» павильонында «Наурыз: игі бастамалардың уақыты» атты мерекелік іс-шара өтті.

Аразды татуластырып, елді бірлікке шақыратын Ұлыстың ұлы күнін асыға күткендердің бірі- Владимир Гвоздев. Ол қазақтың ұлттық киімін тек Наурыз мерекесінде емес, үнемі киіп жүруге тырысатынын айтады. Басты мақсаты — қазақтың салтын, дәстүрін дәріптеу.

Владимир Гвоздев, суретші:

Наурыз бәріміз үшін ұлық мерекенің бірі. Көктемнің жаңаруымен келетін бұл күнде бәріміз арқа-жарқа боламыз. Шетте жүрсек те, Қазақстандағыдай атап өтуге тырысамыз, себебі бұл күнді бала кезден күтеміз. Кең пейілді қазақстандықтарға сәлем жолдаймын, әр шаңырақта береке болсын. Сіздерді сағындым.

Әз мейрам күні ақ дастархан жайылып, наурыз көше пісірілді. Сонымен қатар, әуезді ән шырқалып, қазақтың күйі күмбірледі.

Сәуле Дулати, Ресей федерациясындағы «Қазақ тілі» халықаралық орталығы өкілдігінің басшысы:

Бүгін осы ВДНХ-ға, Қазақстан павильонына Ресейдің әр аймақтарынан қазақтар қауымдастығы келіп жатыр. Бұларға да ол үлкен той. Сондықтан да қазақ елі сіздерге, аспанымыз ашық, бейбіт, ауызбіршілігіміз жоғары деңгейде болсын.

Жалпы Мәскеу қаласы мен Мәскеу облысында 100 мыңға жуық қазақ қоныстанған. Олар ұлық мерекені жыл сайын тойлауды әдетке айналдырды. Әз Наурыз тек Ресей астанасында емес, өзге де өңірлерде тойланады. Онда ұлттық дәстүріміз жаңғырып, құндылықтар дәріптеледі.

Индира Бегайдар