Жуанның жіңішкеріп, жіңішкенің үзілер шағында жұрт

ықылым заманнан үй жайын, қора-қопсысын тазартып, бұлақ көзін ашып, айналасына ағаш отырғызуды әдетке айналдырған. Сондықтан «Наурызнама» онкүндігінің соңғы күні ұлттық экологиялық науқанға арналып отыр. Бүгін еліміздің түкпір түкпірінде тұрғындар таң атқалы тазалық жұмыстарына кірісіп, сенбілікке шықты. Оларға біздің түсірілім тобы да қосылған болатын.

Назым Қайрат, тілші:

- Бүгін Тазару күні. Сондықтан күн шапағы көкті түрген сәттен бастап барлығы маңайларын сыпырып, жиыстырып жатыр. Қол қусырып тұрмайық деп біз де кірісіп кеттік.

«Наурызнама» онкүндігіне экологиялық науқанның енуі бекер емес. Себебі, мемлекет басшысының бастамасымен жүзеге асқан «Таза Қазақстан» экологиялық акциясына былтыр 6 миллион аса адам жұмылып, нәтижесінде 1 миллион тоннадан астам қоқыс жиналды. «Таза өлке», «Мөлдір бұлақ» жобалары аясында қоғамдық ұйым мен кәсіпорындардың аумағы тазаланып, бұлақ бастары ашылды.

Ал «Таза қала» жобасымен Ұлыстың ұлы күні қарсаңында Алматы, Жетісу, Жамбыл, Қызылорда, Маңғыстау және Түркістан облыстарында тұрғындар сенбілікке шықты.

Бақытжан Молдахметов, Алматы облысы экология департаменті басшысының орынбасары:

- Бүгінгі таңда бізде іс-шара бойынша 5 қала Алматы облысының акциясына қатысып жатыр. Алматы облысындағы Қонаев қаласы, Қарасай ауданындағы Қаскелең қаласы, Талғар ауданындағы Талғар қаласы, Еңбекшіқазақ ауданындағы Есік қаласы, сол осы қала бойынша ағаш отырғызу, судың жан-жағындағы қатты тұрмыстық қалдықтарды тазалаудан акция жүргізіліп, соған қол ұшын беріп, бүкіл Алматы облысының елі қатысып жатыр. Ол акция бір ай болады. Сәуірдің 21-іне дейін жалғасын табады.

- Е, Алла, елімізге, халқымызға тыныштық бере көр. Аллаға жағам десең, азанды бол, ағайынға жағам десең, қазанды бол. Халқыма жағам десең әділ бол, судай таза бол.

Тазалық жұмыстарынан бөлек, оңтүстік өңірдегі ағайын ағаш егу науқанына да белсене араласып кетті. Наурыз қарсаңында Сайрам-Өгем ұлттық табиғи паркі қызметкерлері мектеп ұжымымен бірлесе 40 түп ағаш отырғызды.

Қалжігіт Қалбаев, Сайрам-Өгем мемлекеттік ұлттық табиғи паркінің экологиялық ағарту және туризм бөлімінің басшысы:

- Оның ішінде можевельник, туя, катайпа, қарағаш және басқа да жеміс ағаштарын отырғызу бүгін іске асырылады. Бүгінгі іс-шараларға 50-ден астам қатысушы және мектеп ұжымдары, одан бөлек осы ауыл тұрғындары, қала тұрғындары қатысуда. Түркістан облысы бойынша 2025 жылы 550 мыңнан астам ағаш көшеттерін отырғызу жоспарланған.

Қоршаған орта тазалығына бей-жай қарамау қоқыс жинаудан ғана емес, оны сұрыптап, қалдықты мейлінше аз шығарудан тұрады. Осы мақсатта апта басында елордалық жас өнертапқыштар Экология және табиғи ресурстар министрі мен Оқу-ағарту министріне экологияны жақсартуға арналған ғылыми жобаларын таныстырды.

Нұрбақыт Ермекұлы, Ә.Марғұлан атындағы №46 мектеп-лицейінің 5 сынып оқушысы:

- Біздің жобамыз – Есіл өзенінің экологиялық жағдайы және ондағы қоқыстарды қалай жинаймыз және тазартамыз. Ең бірінші, біз қорғаныш торларын орнатамыз. Олар желмен ұшып келген қалдықтарды және адамдар тастаған қоқыстарды 60-70 пайыз болсын ұстап тұруына септігін тигізеді.

Айзат Шаяхмет, Ә.Марғұлан атындағы №46 мектеп-лицейінің 5-сынып оқушысы:

- Қоршаған ортамыз біздің ортақ үйіміз. Оны барлығымыз қорғау керекпіз, аялау керекпіз.

Ерлан Нысанбаев, ҚР Экология және табиғи ресурстар министрі:

- Бүгін мен өте қуаныштымын өздеріңізбен кездескеніме. Себебі болашақ сіздердікі. Жасөспірім біздің балаларымыз. Ертеңгі Қазақстанның сәнді болуы, таза болуы, әрине, сіздерге байланысты.

Қоқыс қалдықтарын дұрыс сұрыптау мақсатында Жезқазған және Астана қаласындағы мектептерге экобокстар қойылып, шыны және пластик бөтелкелерді қабылдайтын фандоматтар орнатылды. Мұндай бастамалардың жеткіншектер арасындағы экологиялық мәдениетті қалыптастыруда айрықша роль атқаратыны анық.

Аймақтағы тілшілер көмегімен Назым Қайрат, Ержан Рахманбердиев