АҚШ өз азаматтығын таратып жатыр , алам десеңіз, үлгеріп қалыңыз.

Құрама Штаттардың жаңа басшылығы аз уақытта 185 триллион (!) доллар табыс әкелуі мүмкін кіріс қайнарын ашты.

Атап айтқанда, Америка тек бір күн ішінде әрқайсысы 5 миллион доллар тұратын "Алтын визаның" мыңын сатып үлгерген. Демек, бір күнде 5 миллиард доллардай табыс тапты.

Енді оны дүниежүзіндегі 37 миллион адамға өткізуге ниетті.

Бұл қымбат виза АҚШ азаматтығын алуға, елде тұрақты тұруға, барлық штатта еркін қозғалуға, қалаған жұмысын істеуге, тіпті дауыс беруге рұқсат етеді.

Шетелдік инвесторлар 1 күн ішінде мың "Алтын визаны" сатып алды және оның әрқайсысы үшін 5 миллион доллардан санап берген.

Бұл туралы "All-In Podcasts" беделді подкаст студиясына сұхбатында АҚШ Сауда министрі Говард Латник мәлімдеді.

Оның айтуынша, Трамптың жаңа "Алтын визасы" оның иегеріне АҚШ-та тұрақты тұруына, америкалықтар пайдаланатын құқықтардың игілігін емен-жарқын көруіне мүмкіндік береді. Сондай-ақ қаласа, Құрама Штаттардың азаматтығын алуына жол ашады.

Айта кету керек, АР агенттігі сұхбаттың 21 наурызда шыққанын хабарлады. Алайда подкасттың қашан жазылғаны нақтыланбады.

"Кеше ғана біз осындай 1 мың картаны өткіздік! Бүгінде әлемде осы картаны сатып ала алатын 37 миллион адам бар. Олардың бәрі біздің әлеуетті сатып алушымыз. АҚШ Президенті Дональд Трамптың байламынша, біз қазірдің өзінде "Алтын визаның" 1 миллионын өткізе аламыз", – деді министр Латник.

Бұған дейін Дональд Трамп "Алтын визаны" тек жеке тұлғалар ғана емес, әлемдегі ірі корпорациялар, бай компаниялар да сатып ала алатынын білдірді.

Америка лидерінің пікірінше, мысалы, америкалық компаниялар осы арқылы елден депортациялану қаупі төнген мықты маманын құтқара алады. Немесе, шетелдегі ең дарынды, білікті, ақылды адамдарға оны сатып әперіп, АҚШ-қа алғыза алады.

Сондай-ақ шетелдік компаниялар да мәселен, өз басшыларына, акционерлеріне америкалық "Алтын визаны" тарту ете алады. Бұл енді мерейтойға, атаулы датаға орай әлемдегі ең қымбат әрі ең қалаулы сыйлыққа айналуы мүмкін.

Америкалық телеарналар эфирінде сарапшылар үшінші әлем елдерінде шенеуніктер енді параны да "Алтын визамен" талап ете бастауы мүмкін деген қызықты болжам айтты.

Олар "Алтын виза" әлемде "алтын безгегін" туындатуы мүмкіндігін қаперге салды.

АҚШ Сауда министрі Говард Латник мұны жоққа шығармады. Оның айтуынша, ауқатты шетелдіктерге америкалық "Алтын визаны" жаппай сату идеясы америкалық лидерде инвестор Джон Полсонмен кездесуден кейін пайда болыпты.

Америкалық миллиардер Джон Полсон ірі хедж-фондты басқарады, Paulson&Co атты инвестицияларды басқару жөніндегі ньюйорктік төл фирмасына жетекшілік етеді.

"Жоғарғы қаржылар саласындағы атақты тұлғаның бірі" деген даңққа ие Полсон елді заңсыз мигранттардан тазарту аясында шетелден арман қуып келген табиғи таланттардан айырылып қалмау керектігін мәселе етіп көтеріпті.

Осыдан кейін Трамп Сауда министрін шақырып алып, осы идеяны жүзеге асыру тетіктерін пысықтауды тапсырды. Ал, миллиардер Илон Маск бұл ғаламат жобаны бағдарламалық қамтамасыз етумен айналысуда.

"Егер мен шетелдік болсам, менің байлығым болса, онда өз елімнің азаматтығын сақтай отырып, отбасымның барлық мүшелері үшін Американың "Алтын картасын" сатып әперер едім! Соның арқасында кез келген уақытта, әсіресе, елде сұрапыл соғыс басталса, немесе басқа да дағдарыс белең алса, мен отбасыммен Америкаға келіп, бас сауғалай аламын", – деп жарнамалады министр Латник.

Сауда министрлігінің басшысы Трамптың "Алтын визасы" бұған дейін қолданылып келген EB-5 бағдарламасын толық алмастыратынын мәлімдеді.

Айтпақшы, EB-5 бағдарламасын ел Парламенті – Конгресс енгізген болатын. Ендеше оны жою үшін депутаттардың келісімін алуы қажет. Алайда Конгрестің қос палатасында басымдыққа ие Республикалық палата Трамптың бұл бастамасына қарсы бір сөз айтқан жоқ.

EB-5 бағдарламасы 1990 жылы іске қосылды және АҚШ экономикасына кем дегенде 1,05 миллион доллар инвестиция құйған шетелдік инвесторларға және олардың туыстарына "гринкарта" алуға, содан соң АҚШ азаматтығын иеленуіне мүмкіндік беретін.

Сондай-ақ, егер инвестор ауылдық елді мекенде немесе жұмыссыздық деңгейі жоғары өңірлерде бизнес жоба бастаса, немесе әлдебір жергілікті кәсіпорынды жандандырса, онда 800 мың доллар салса да жеткілікті болатын.

Президент Джо Байден тұсында, бір 2024 жылы АҚШ Мемлекеттік департаменті EB-5 Immigrant Investor Program визасының 12 мыңнан астам данасын берді. Бұл бағдарлама тарихындағы рекордтық көрсеткіш саналады.

Яғни, Байден әкімшілігі де сол "гринкарта" түрі есебінен елге кем дегенде 12 миллиард доллар инвестиция тарта алды.

Соған қарамастан, елдің қазіргі басты "саудагер" министрі Говард Латник EB-5 бағдарламасын "арсыздық пен алаяқтыққа толы мағынасыз, былшыл бағдарлама" деп сөкті.

Бұл ретте EB-5 бағдарламасы визасының иегері ұдайы бақылауда болатын, ол америкалық экономикаға инвестиция салуын үнемі жалғастыруы керек, бұрын салған қаржысын шығарып әкете алмайды, әйтпесе, "гринкартасының" күші жойылады.

Ал, Трамптың "Алтын визасын" кім көрінген 5 миллион долларға бір рет сатып алса, жеткілікті. Экономикаға қаражат құю бойынша талаптар қойылмайды.

Дегенмен, Латник "егер қандай да бір жан түршігерлік нәрсе жасаса, шетелдік сатып алған "Алтын картасынан" да айрылып қалуы мүмкін" екенін жеткізді.

Сонымен бірге, Трамптың "Алтын визасы" Конгрестің арнайы заңымен, тіпті қарапайым қарарымен қабылданбағандықтан, жаңа картадан айыру негіздері мүлдем белгісіз, құжат жүзінде қарастырылмаған.

АҚШ-тың жаңа Президенті "алтын визаларды" енгізу және сату туралы жоспарын биылғы ақпан айының соңында жариялаған болатын. Дональд Трамп оны тіпті ресейлік бизнесмендердің де алуын жоққа шығармады.

Америкалық көшбасшы Ресейдің ауқатты азаматтары арасынан "бірнеше өте жақсы адаммен" жеке таныс екенін, олар да бұл өнімге құмарта алатынын білдірді.

Трамп "алтын карталар "құтырған" (sell like crazy) қарқынмен сатылып кететініне" сенім білдірді.

Ақпарат құралдары "Алтын виза" иелерінің тізімі еш жерде жарияланбағанын, сондықтан оның иегерлерінің алғашқы мыңдығында кімдердің барлығы беймәлім екендігін айтады.