Бас прокуратура Арғын Нығматулинге қатысты қылмыстық іс қандай бап бойынша тергеліп жатқанын айтты , — деп хабарлайды Massaget.kz тілшісі.

Бас прокуратура Tengrinews.kz-тің ресми сауалына берген жауабында қылмыстық іс бөтен мүлікті иемдену бабы бойынша тергеліп жатқанын мәлімдеді.

"А.З. Нығматулин және басқа да тұлғаларға қатысты Қылмыстық кодекстің 189-бабы 4-бөлігі 2-тармағы ("Сенiп тапсырылған бөтен мүлiктi иемденiп алу немесе талан-таражға салу") бойынша тергеу жүргізіліп жатыр. Сот Нығматулинға қамауға алу түріндегі бұлтартпау шарасын санкциялады, оған іздеу жарияланды", – деп мәлімдеді Бас прокуратура өкілдері.

Айта кетейік, Қылмыстық кодекстің 189-бабы 4-бөлігінің 2-тармағы бойынша сеніп тапсырылған бөтен мүлікті иемденген немесе талан-таражға салған адам 7 жылдан 12 жылға дейін бас бостандығынан айырылып, мүлкі тәркіленіп және белгілі бір лауазымдарды атқару құқығынан айырылуы мүмкін.

Еске салайық, бұған дейін Антикор Нұрлан Нығматулиннің ағасы Арғын Нығматулинді іздестіріп жатқаны хабарланған болатын. Бұл ақпарат құқықтық статистика органдарының сайтында жарияланды.

Арғын Нығматулин туралы не белгілі?

Ашық дереккөз мәліметінше, Арғын Нығматулин — Мәжілістің бұрынғы төрағасы Нұрлан Нығматулиннің және экс-депутат Ерлан Нығматулиннің ағасы.

Ол 1955 жылы 28 маусымда дүниеге келген. 2007 жылғы сәуірден 2018 жылға дейін "Сарыарқа" хоккей клубы" ЖШС директоры қызметін атқарды. Қарағанды облыстық мәслихатының депутаты болды.

Instagram парақшамызға жазылып, ең қызықты ақпараттарды бірінші болып оқыңыз!