Олжас Бектенов Павлодар облысына жұмыс сапары барысында түсті жоғарғы металлургия колледжінде болды, деп хабарлайды 24kz.

Премьер-министр өңір өнеркәсібінде сұранысқа ие болашақ мамандардың дағдыларымен танысты.

Айта кетейік, облыста кәсіптік-техникалық білім беруді дамыту шеңберінде «Жаңа кәсіптер атласы» енгізіліп жатыр. Сондай-ақ «Колледждер альянсы» құрылуда. Үкімет басшысы білім министрлігіне өзге де өңір әкімдіктерімен бірлесіп, осы тәжірибені енгізуді тапсырды.

Сонымен қатар Олжас Бектенов Президент тапсырмасымен ашылған «Самғау» балалар шығармашылық орталығын да көрді. Орталық 9 мың жас талантты қабылдауға лайықталған. Онда би және театр залдары, ғылыми зертханалар, сәулет, пікірталас және IT-технологиялар студиялары бар. Екібастұз балаларының 70%-ін қосымша біліммен қамти алады.

Ришат Әміренов, еңбек ардагері

- Осыдан екі жыл бұрын Қасым-Жомарт Тоқаев келгенде осы халық арасынан балаларға осындай орталық ашылса деп ұсыныс жасағанбыз. Міне, екі жыл ішінде керемет атына заты сай осындай орталық пайдалануға беріліп отыр. Немерелерім қатысып отыр. Өте қуаныштымын. «Самғауға» барамыз деп ұмтылып тұрады. Бұл – болашақ. Балаларға осындай жағдай жасалғанына біз өте қуаныштымыз.