0:00:00

Жаңалықтарды Telegram арнамыздан оқыңыз !

Жамбылдағы жер сілкінісінен кейін зақым келді деген тұрғын үйлер саны 10 есеге қысқарды. Тұрғындар тарапынан түскен арыздарды қараған арнайы комиссия 110 баспананы тізімнен шығарды.

Көзбен шолу, яғни визуалды қарау арқылы «жер сілкінісі әсерінен емес» деген қорытынды қабылданған. Сарапшылар Меркіден 14 үйді, Тұрар Рысқұлов ауданынан 96 баспананы тұруға жарамды деп отыр. Сондай-ақ әлеуметтік нысандар саны да едәуір азайды. Екі ауданға қатысты бұған дейін 17 әлеуметтік нысан бүлінген еді. Бірақ бүгін 12 нысан тізімнен шықты. Тұрар Рысқұлов ауданында тек бір мектеп, балабақша мен ауылдық амбулаторияға зақым келген. Нысандарды толыққанды талдау жұмысына 8 сарапшы тартылды.

Анар Мұздыбаева, «Күншуақ» балабақшасының шаруашылық меңгерушісі:

Мына жарылғандарды кіріп, шығып, көріп шықты. Бірақ қабырғалар құлаған жоқ. Жарық бұған дейін де болған ғой. Енді түндегі жер сілкінісінен кейін қатты ашылып тұр арасы. Құдайға шүкір балалар болған жоқ қой түн ортасында. Қарауылымыздан басқа бұл жерде ешкім болған жоқ.

Ал Меркіде аудандық орталық аурухана мен «Балдәурен» балабақшасы бүлінген. Әсіресе бөбекжай қатты зақымданған. Нысанның тең жартысы жарамсыз жағдайда тұрғандықтан бала қабылдауға болмайды. Мектепке дейінгі мекемені жөндеу үшін сәуір айының ортасында сараптама жасалады.

Ернар Әбілдаев, Меркі ауданы әкімінің орынбасары, арнайы комиссия мүшесі:

Орын алған төтенше жағдай бойынша қазіргі уақытта ахуал тұрақты. Барлық қызметтер штаттық режимде жұмысын жалғастыруда. Ықтимал қауіп-қатердің алдын алу мақсатында құрылған облыстық және аудандық жедел штаб белгіленген алгоритимге сәйкес өз жұмыстарын атқарды. Зерделеу нәтижесіне сәйкес тиісті шешім қабылданатын болады.

Данияр Әлімқұл