Стамбұлда өткен Ресей мен Украина арасындағы бейбіт келіссөздер нәтижесінде тараптар тағы да тұтқын алмасуға келісті. Келісімге сәйкес, екі жақ 25 жасқа дейінгі және жаралы сарбаздардың барлығын алмастыруға уағдаласты.

Бұдан бөлек, Ресей Украинаға 6 000 сарбаздың мүрдесін қайтаратын болды. Сондай-ақ майдан шебінде қайтыс болғандардың денесін жинау үшін белгілі бір аумақтарда атыс уақытша тоқтатылатын болды.

Украина тарапы Ресейден соғыс кезінде алып кеткен балаларды қайтаруды талап етті. Сонымен қатар, келіссөздердің келесі раундын осы айдың 20-сы мен 30-ы аралығында Ыстанбұлда өткізуді ұсынды. Алайда бұл жөнінде нақты келісімге келген жоқ.

Сарапшылар мұндай қадамдар бейбіт келісімге жақындаудың маңызды белгісі екенін атап өтті.

Гүңгөр Явузаслан, халықаралық саяси сарапшы:

«Украина мен Ресей арасындағы келіссөздердің екінші раундында бірден бейбіт келісімге қол қойылмайтыны анық еді. Дегенмен тұтқын алмасу сияқты қадамдар да бейбіт шешімге апарар жолда өте маңызды. Түркия алдағы уақытта Путин мен Зеленскийдің кездесуін ұйымдастыруға мүдделі екенін білдірді. Бұл — соғысты тоқтатуға бағытталған маңызды шешім болар еді», — деді сарапшы.

Айдос Әшім