Ақордада Астанаға ресми сапармен келген Болгария Президенті Румен Радевті салтанатты қарсы алу рәсімі өтті. Бұл туралы Ақорданың баспасөз қызметі хабарлады.

Құрметті қонақты қарсы алу рәсімінде Мемлекеттер басшылары бір-біріне ресми делегация мүшелерін таныстырды. Құрмет қарауылының бастығы рапорт берген соң екі елдің мемлекеттік әнұрандары шырқалды.

Жоғары деңгейде өтетін келіссөздер барысында қазақ-болгар сауда-экономикалық және инвестициялық ынтымақтастығының перспективасы талқыланады.

Румен Радев кім?

61 жастағы Румен Радев Болгарияның бесінші президенті. Ол қызметіне 2017 жылдың қаңтарында кіріскен. 2014-2016 жылдары Болгарияның Әскери әуе күштерін басқарған. Шені – Генерал-майор.

Радев әскери тұлға. 1992 жылы Америка Құрама Штаттарындағы Максвелл эскадронының офицерлер мектебін бітірген. 2003 жылы ол АҚШ-тағы Максвелл AFB әуе соғысы колледжін стратегиялық зерттеулер магистрі дәрежесімен үздік аяқтаған.

1987 жылдан бастап әскери карьерасын бастаған. Бірінші дәрежелі ұшқыш. Әскери карьерасында ұзын-ырғасы 1400 сағат ұшқан екен. Ол L-29, L-39, МиГ-15УТИ, МиГ-17, МиГ-21, МиГ-29, F-15, F-16, F/А-18, Еурофайтер, Тайфун секілді замануаи жойғыш ұшақтарды тізгіндеген.

Ал саяси карьерасы 2016 жылдан басталады. 2016 жылы Болгарияның социалистік партиясы Радевті президенттікке үміткер ретінде ұсынған. Президенттік қызметіне 2017 жылы кіріскен. Ал 2021 жылғы сайлауда ол қайтадан президент болып сайланған.