Белгілі журналист, жазушы, публицист, аудармашы Мақсот Ізімұлы дүниеден озды. Қаралы хабарды Қазақстан жазушылар одағы жеткізді, деп хабарлайды KAZ.NUR.KZ.

"Белгілі жазушы, публицист, аудармашы Мақсот Ізімұлы 2025 жылы 9 маусымда 65 жасқа қараған шағында дүниеден өтті. Марқұммен қоштасу рәсімі 2025 жылы 10 маусым сағат 10-00 де Жазушылар одағының ғимаратында (Абылай хан даңғылы, 105 үй) өтеді", — делінген жазушылар одағының Telegram-дағы арнасында жарияланған хабарламада.

Егемен Қазақстан басылымының жазуынша, Мақсот Ізімұлы ұзақ жылдар бойы бұқаралық ақпарат құралдарында жемісті еңбек еткен.

Ол "Орал өңірі", "Ана тілі", "Теміржолшы – Железнодорожник", "Аруана" сынды басылымдарда, сондай-ақ "Зерде", "Жалын" журналдары мен "Қазақ энциклопедиясы" редакциясында қызмет атқарған. "Арыс" баспасының бас редакторы және "Астана ақшамы" газетінің әдеби редакторы болған.

Мақсот Ізімұлы – "Аяқталмайтын әңгіме" және "Бедеріндей кестенің" атты прозалық жинақтардың авторы. 2004 жылы оның шығармасы Мәдениет және ақпарат министрлігінің тапсырысымен жарық көрген "Нарық нақыштары" антологиясына енген.