0:00:00

Жаңалықтарды Telegram арнамыздан оқыңыз!

Алматыда тапа-тал түсте әуежай қызметкерін кепілге алған ер адам ұсталды.

Қолында пышағы бар ол қыздың шашынан ұстап, бәрін жарып жіберемін деп қорқытқан. Оқиға бүгін сағат 11:45-те ішкі рейстер терминалында болған. Кепілдегі қызметкерді танысын шығарып салуға келген 52 жастағы Мұса Әбдірайым есімді азамат құтқарып қалды. Ол қыздың орнына өзін кепілдікке алуын айтып, сәтті пайдаланып қолындағы пышағын жұлып алған. Көліктегі полицияның мәліметінше, жолаушы ретінде келген белгісіз адам Авиациялық қауіпсіздік қызметкерінің «құжатыңызды көрсетіңіз» деген талабын орындаудан бас тартқан.

Ләззат Қасымжанова, ІІМ көліктегі полиция Департаментінің ресми өкілі:

Полиция қызметкерлері әуежайдың қауіпсіздік қызметі және шығарып салушы азаматтың көмегімен құқық бұзушыны залалсыздандырып, полиция бөлмесіне жеткізді. Тексеру барысында оның 67 жастағы Алматы қаласының тұрғыны екені анықталды. Аталған факт бойынша қылмыстық іс қозғалды. Қазіргі уақытта тергеу амалдары жүргізілуде.

Бұл оқиға Президентке де жетті. Мемлекет басшысы Қасым-Жомарт Тоқаев қылмыскердің суық қаруын тартып алып, ұстауға көмектескен ер адамның батылдығын ерекше атап өтіп, оны мемлекеттік наградаға ұсынуды тапсырды.

Ернұр Медет