Театрлар классикалық шығармаларды жаңа форматта ұсынып жатыр. Мысалы, Астанадағы опера және балет театрында қойылып жатқан неміс хореографы Раймондо Ребектің «Күлбике» атты балетіндегі кейіпкерлердің мамандығы, киім-кешегі және басқа да декорация бұйымдары қазіргі қолданыстағы заттар.

Орта ғасырда скутер бар. Күлбике –дизайнер-модельер, ал Ханзада – композитор-диджей. Осылай жарты ғасырдан артық уақыт бойы сахналанып келе жатқан «Күлбике» ертегісі қазіргі заманға сай өзгертілген.

Ғұмар Сұлтанбек, Астана Опера театрының солисі:

Неондық жарықтар, одан бөлек sigway скутер. Осы жерде фея дейді ғой ,сол ер кейіпінде шығып сол скутердың қызбен бірге билеп өнер көрсетеді. Сол феяның рөлін сомдаған болатынмын. Гироскутердың үстінде өнер көрсету үшін біраз еңбектендік, дайындалдық сахнада бәрі мінсіз өтуде.

Декорация ғана емес, қойылымның хореографиялық сипаты да өзгерген. Қазіргі джаз, поп бағытындағы танымал туындылар да балеттің сәнін арттырып отыр.

Адамжан Бахтияр, Астана Опера театрының жетекші солисі:

Біз әлемді өзімізге қаратып, өнерлі жандарды өзімізге тартамыз десек, осындай эксперименттер жасауға тура келеді. Жаңа формат көрермендердің ойынан шыққан секілді. Себебі сіз бен біз күнделікті өмірде тұтынып жүрген кейбір дүниені сахнадан көру көрерменге тосынсый болды.

Бұл модернизациялық қойылымды германиялық балетмейстер Раймондо Ребек сахнаға шығарды. Либретто авторы әрі қоюшы хореограф бұған дейін де Астана Опера театрында бірнеше спектакль қойған білікті маман. Жаңа қойылым театрға хореографиялық, музыкалық және технологиялық тұрғыдан тың өзгерістер енгізген.

Томирис Байғабыл